ԱԺ ՔՊ խմբակցության պատգամավոր, ԱԺ Աշխատանքի եւ սոցիալական հարցերի մշտական հանձնաժողովի նախագահ Հերիքնազ Տիգրանյանը լրագրողների հետ ճեպազրույցում անդրադարձավ հասարակական տրանսպորտի սակագնի թանկացման դեմ բոյկոտին եւ հարցին, թե հիմնավո՞ր է համարում թանկացումը։
«Հիմնավորված եմ համարում թանկացումը։ Ինչո՞ւ գինը պետք է բարձրանա, որովհետեւ ծառայության որակն է փոխվում, ծառայության մատուցման մակարդակն է փոխվում։ Բնականաբար, նոր ծառայությունը բերում է նոր գներ։ Երբ ասում եք՝ գեներացվեց դժգոհություն եւ բոյկոտ, գուցե սոցիալապես անապահով անձանց համար կարող է լինել բեռի ավելացում, բայց ես չտեսա, որ բոյկոտողները հենց այդ մարդիկ են, որովհետեւ իրենց համար արվում են արտոնություններ, որոշակի զեղչեր։ Դժգոհողները մեծահասակներն են, որոնց համար ամեն նորությունը եւ տեխնիկայի հետ աշխատանքի ամեն ինչը դիսկոմֆորտ է։ Երբ իրենց հարմարավետությունից դուրս են գալիս, սկսում են անհանգստանալ։ Ես կարծում եմ, որ դա էլ ժամանակի խնդիր է, բայց ես կարծում եմ՝ դա ամենեւին կապ չունի բոյկոտի հետ։ Բոյկոտը քաղաքական ակցիա է, անում են քաղաքական ուժերը, նրանց հետեւում կանգնած քաղաքական խմբերը, բայց ռեալ դժգոհություն մարդկանց մոտ կարող է առաջանալ ընդամենը նրանից, որ ծանոթ չեն ուղղակի կիրառման տեխնիկային»,- ասաց նա։
ՔՊ-ական պատգամավորը հարցադրում արեց․ «Դուք 150 դրամից դժգոհություն եք նկատե՞լ, գուցե մենք տարբեր դրվագներ ենք դիտել։ Կարող է հիմա չեն վճարում՝ որպես բոյկոտ, բայց եթե բարեխիղճ ես, օգտվում ես ծառայությունից, վճարում ես ծառայության համար։ Ընդ որում, բոյկոտում են մարդիկ, որոնք շատ ավելի վճարունակ են, ես անվճարունակի բոյկոտ դեռ չեմ տեսել»։
Կարդացեք նաև
Ռոզա ՀՈՎՀԱՆՆԻՍՅԱՆ
