Բրյուսելում տեղի է ունենում ԵՄ առաջնորդների ոչ պաշտոնական հանդիպումը, որին մասնակցում են նաև ՆԱՏՕ-ի գլխավոր քարտուղար Մարկ Ռյուտեն և ԵՄ անդամ չհանդիսացող Մեծ Բրիտանիայի վարչապետ Քիր Սթարմերը։
Քննարկման գլխավոր թեման ռուսաստանյան պոտենցիալ սպառնալիքի պայմաններում Եվրամիության պաշտպանունակության ամրապնդումն է։
Եվրոպացի առաջնորդները քննարկում են նաև ԱՄՆ նախագահ Դոնալդ Թրամփի վերջին հայտարարություններն ու հնարավոր քայլերը․ Սպիտակ տան ղեկավարը չի բացառել, որ ԵՄ-ից ԱՄՆ ներկրվող ապրանքների համար մաքսատուրքեր կարող է սահմանել։
Նախագահ Թրամփն արդեն հրամանագիր է ստորագրել, որով ԱՄՆ-ի հարևանների՝ Կանադայի և Մեքսիկայի նկատմամբ մաքսատուրքեր են սահմանվում։ Լրատվամիջոցներն այդ քայլն անվանում են «առևտրային պատերազմ»։
