«Պահանջում ենք Նիկոլ Փաշինյանից՝ թող հրապարակի արցախյան կարգավորման բոլոր միջնորդների պաշտոնական առաջարկները և ՀՀ-ի պաշտոնական առաջարկները՝ նամակագրությունն էլ հետը։ Մենք մտահոգվելու բան չունենք՝ կոնկրետ երրորդ նախագահի թիմը։ Կարծում եմ՝ առաջին և երկրորդ նախագահների թիմերն էլ չունեն մտահոգվելու բան, քանի որ երեքի ժամանակ էլ Արցախը եղել է անկախ և հայկական»,- մամուլի ասուլիսի ժամանակ ասաց ՀՀԿ գործադիր մարմնի անդամ Էդուարդ Շարմազանովը։
Լրագրողները հիշեցրին՝ Նիկոլ Փաշինյանը հորդորել էր, որ ՀՀ նախագահների գրասենյակներն իրենք հրապարակեն այդ փաստաթղթերը, Էդուարդ Շարմազանովն արձագանքեց․ «Գրասենյակներն այդ լիազորությունները չունեն։ Դա պետական գաղտնիք է։ Ինքը պիտի հրապարակի»։
Նա վստահեցրեց՝ Սերժ Սարգսյանի բանակցած վերջին փաստաթուղթը եղել է կազանյան փաստաթուղթը, և դրանից հրաժարվել է ոչ թե Սերժ Սարգսյանը, այլ Իլհամ Ալիևը, և դա եղել է ամենահաջողված փաստաթուղթը։
Անդրադառնալով երեք նախագահների հետ բանավիճելու առիթով Նիկոլ Փաշինյանի դիրքորոշմանը, Էդուարդ Շարմազանովն ասաց․ «Էդ որ ասում է՝ բանավիճելու չունեմ այլևս, էդ իր հետ ո՞վ է բանավիճո՞ւմ, որ մի հատ էլ ինքը բանավիճելու չունի։ Երեք նախագահներն էլ ասացին՝ հեռու խաղա, մենք քեզ հետ բանավիճելու բան չունենք»։
Կարդացեք նաև
Անդրադառնալով այն մեղադրանքներին, թե Ռոբերտ Քոչարյանը Մեղրին տալիս էր, Էդուարդ Շարմազանովն ասաց․ «Քոչարյանը Մեղրին տալիս էր, Ալիևն էլ չէր վերցնո՞ւմ։ Ռոբերտ Քոչարյանի բանակցային ժառանգության արդյունքը մադրիդյան փաստաթուղթն է, որի տրամաբանական շարունակությունը կազանյան փաստաթուղթն է։ Էդ ո՞նց եղավ՝ երեք նախագահները տալիս էին, Ալիևը չէր վերցում, Նիկոլը չէր տալիս, բայց վերցրի՞ն։ Հանձնողներից չէին վերցնում, չհանձնողի՞ց էին վերցնում»։
Էդուարդ Շարմազանովը վստահեցրեց․ «Արցախը հանձնել է Նիկոլ Փաշինյանը, Արցախի հայաթափման ժամանակ մատը մատին չի խփել Նիկոլ Փաշինյանը, ՀՀ-ում թուրքական ու ադրբեջանական խոսույթ է բերում Նիկոլ Փաշինյանը»։
Տաթև ՀԱՐՈՒԹՅՈՒՆՅԱՆ
