Այսօր Շիրակի մարզպետարանի շենքի դիմաց բողոքի ցույց անցկացնող մսավաճառներից մեկը մեզ հետ զրույցում նեղվեց, թե բան-գործ թողած՝ անընդհատ բողոքի ցույցեր են անցկացնում ու նկարահանվում, ինչ է՝ կառավարությունը իրեն նեղություն չի տալիս կարգավորել սպանդանոցների հարցը։
Շիրակի մարզում գործող սպանդանոցներ չկան, սակայն, ըստ բողոքավորների, տաք տեղերում նստած՝ որոշումներ են կայացնում ու իրենց տուգանում։
«Վեց տարի է՝ էս նույն հարցն է, էսպես չի լինի, ո՞ւր հասնենք, Արմավի՞ր, որ միսը սպանդի ենթարկենք, գործ էլ չկա, պայմաններ ստեղծեք, նոր պահանջեք։
Մարդիկ ասում են միսը թանկ է, չենք կարող առնել, եթե Նոր Տարվան 3 կիլոգրամ միս էին գնում, հիմի 1 կիլոգրամից ավել գնող չկա, մարդիկ հազիվ են ապրում։ Սխալվես, միսը հանես վաճառքի, առգրավում-տանում են, վրեդ էլ 300 հազարից պակաս ակտ չեն գրում»,-նեղվեց մսավաճառներից մեկը։
Կարդացեք նաև
Մեկ այլ տարեց մսավաճառ էլ հավելեց․ «Ամոթ է, միս ծախող ենք, ԴիԿապրիոն ենք դարձել, սաղ օրը տելեվիզորի դեմն ենք, խայտառակ եղանք, հասկացանք, չորս կիլո մսի համար դերասան դառանք»։
Մսավաճառներին սատարելու եկած իրավապաշտպաններից մեկն էլ ասաց, որ իրավական պետության մեջ ժողովրդի արդար պահանջն անտեսելու իրավունք չունեն։
«Եթե աշխատավոր մարդու կենդանին պիտի սատկի դաշտում, հնարավոր չէ փրկել, մարզում էլ չունեն սպանդանոց, որ արագ հասցնեն, մինչև տանեն, հասցնեն այլ մարզ, էդ մսամթերքն այլևս վաճառքի պիտանի չէ, ո՞վ կտուժի, աշխատավոր մարդը։ Կառավարությունը ոչինչ չի անում գյուղացիներին սատարելու։
Ես դիմում եմ Նիկոլին, ժողովրդավարական պետության մեջ իշխանությունն արհամարհո՞ւմ է ժողովրդին։ Սա՞ է ժողովրդավարական պետությունը»։
Մսավաճառները պայմանավորվեցին բողոքը շարունակել ամսի 6-ին՝ առավոտյան ժամը 10-ին։
Նունե ԱՐԵՎՇԱՏՅԱՆ
