Լրահոս
Օրվա լրահոսը

Հայ Առաքելական Եկեղեցում ժողովրդավարական սկզբունքների բացակայության մասին խոսում է Գերագույն հոգևոր խորհրդի անդամն ու թեմի գործող առաջնորդը։ Սա իսկապես տարակուսելի է

Փետրվար 03,2025 15:26

Լսել նյութի աուդիո տարբերակը

Ձայնագրությունը գեներացված է Armenian Text to Speech արհեստական բանականության միջոցով, որն այս պահին գտնվում է թեստավորման փուլում

Հայաստանի Հանրապետության վարչապետ պարոն Նիկոլ Փաշինյանն ու Հայ Առաքելական Սուրբ Եկեղեցու Շիրակի թեմի առաջնորդ Գերաշնորհ Տեր Միքայել արքեպիսկոպոս Աջապահյանը կարծես իրար հետ մրցակցության մեջ են մտել, թե ով ավելի շատ ու ավելի խնդրահարույց հայտարարություններ կանի։ Թվում էր՝ այդ գործում Նիկոլ Փաշինյանը անգերազանցելի է, սակայն Միքայել սրբազանը վերջերս հաստատուն քայլերով փորձում է նրան հավասարվել։ Իհարկե, նրանց արտահայտած բոլոր «հանճարեղ» մտքերի մասին չեմ պատրաստվում խոսել, սակայն, կարծում եմ, ավելորդ չի լինի անդրադառնալ հունվարի 28-ին լրագրողի հետ զրույցում Միքայել սրբազանի երեք հայտարարություններին։ Մասնավորապես․

1)Եկեղեցում, որ դեմոկրատիա չկա, ո՞նց ենք ապրել 1700 տարի, Եկեղեցում էլ մտցրեք դեմոկրատիա, Եկեղեցին էլ կքանդվի։ Պատկերացրեք չորս տարին մեկ քահանաները հավաքվեն, առաջնորդ ընտրեն, կքանդվի, կվերջանա։

2)95 տարեկան մարդը, որը գիտակից չէ, գիտակցությունը կորցրած է, զառամախտի մեջ է, այդ խեղճ մարդու ընտրությունն ի՞նչ պետք է լինի։

3)Այն անգիտակից մասսան, որը 4 գիրք չի կարդացել, ընդհանրապես իրեն ոչինչ չի հետաքրքրում, նրան ընտրության թողնելը ո՞րն է։

Նկատենք, որ Հայ Առաքելական Եկեղեցում ժողովրդավարական սկզբունքների բացակայության մասին խոսում է Գերագույն հոգևոր խորհրդի անդամն ու թեմի գործող առաջնորդը։ Սա իսկապես տարակուսելի է։ Եթե Եկեղեցում ժողովրդավարության սկզբունքները չեն գործում, ապա ինչի՞ համար են գումարվում Ազգային-Եկեղեցական, Գերագույն հոգևոր խորհրդի ու Վանական խորհրդի ժողովներն ու խորհրդակցությունները, որտեղ կարևորագույն հարցերը լուծվում են քվեարկությամբ։ Հայտնի է, որ Հայաստանից դուրս Հայ Առաքելական Եկեղեցու շատ թեմերում համայնքի կողմից պարբերաբար թեմի առաջնորդի ընտրություններ են տեղի ունենում և այդ թեմերը իրենց բնականոն ռիթմով գործում ու զարգանում են՝ խուսափելով ճահճացումից։ Ուստի, չեմ կարծում, որ Տիրոջ նախախնամության տակ գտնվող Հայ Առաքելական Սուրբ Եկեղեցին կարող է «քանդվել, վերջանալ», եթե թեմի առաջնորդները ժամանակ առ ժամանակ ընտրվելու և վերընտրվելու հնարավորություն կամ իրավունք ունենան։

Գենադի Մնացականյան

Գալով 95 տարեկան մարդկանց քաղաքական ընտրություններին մասնակցելու անիմաստ լինելու թեզին, պետք է նշեմ, որ դա բացարձակ անընդունելի է։ Նախ, սրբազանի բնութագրմամբ, «զառամախտի մեջ տառապող ու գիտակցությունը կորցրած» որևէ մեկը երբեք ընտրություններին չի էլ մասնակցում։ Պարզապես արտահայտվել նրանց մասին նման շեշտադրումով՝ ենթատեքստում ընդգծելով նրանց անօգտակարությունը, չեմ կարծում, որ պատշաճ է հոգևորականի համար։ Եկեղեցու կողմից միշտ խրախուսելի է եղել խոր ծերության արժանացած մարդկանց հանդեպ խորին պատկառանք տածելը և պարսավելի՝ նրանց արհամարհելն ու իրավունքները սահմանափակելը։

Երրորդ հայտարարությանն էլ անդրադառնալով ասեմ, որ իրականության մեջ շատ մարդկանց կարելի է հանդիպել, ովքեր իրենց կյանքում «չորս հատ գիրք չեն կարդացել», բայց շատ հմուտ են կենցաղավարության մեջ։ Գրագիտությունն ու խելացիությունը միշտ չէ, որ շաղկապված են։ Անվիճելի է, որ գրագիտությունը առավելություն է և գրագիտության ու խելացիության համատեղությունը ավելի զորավոր է, սակայն նման բարեբախտությամբ չօժտված մարդկանց մասին Տիգրան Ավինյանի հոր ոճով խոսելը հոգևորականի պարագայում առավել անթույլատրելի է։ Չպետք է մոռանալ նաև, որ Հայ Առաքելական Սուրբ Եկեղեցի հաճախողների մեջ էլ ոչ բոլորն են գիտությունների երիտասարդ թեկնածուներ ու դոկտորներ։

Գենադի ՄՆԱՑԱԿԱՆՅԱՆ

Համաձայն «Հեղինակային իրավունքի եւ հարակից իրավունքների մասին» օրենքի՝ լրատվական նյութերից քաղվածքների վերարտադրումը չպետք է բացահայտի լրատվական նյութի էական մասը: Կայքում լրատվական նյութերից քաղվածքներ վերարտադրելիս քաղվածքի վերնագրում լրատվական միջոցի անվանման նշումը պարտադիր է, նաեւ պարտադիր է կայքի ակտիվ հղումի տեղադրումը:

Մեկնաբանություններ (0)

Պատասխանել

Օրացույց
Փետրվար 2025
Երկ Երե Չոր Հնգ Ուրբ Շաբ Կիր
« Հուն    
 12
3456789
10111213141516
17181920212223
2425262728