«Ինչպես աշխարհի մի շարք երկրներում, այնպես էլ Հայաստանում ջրծաղիկը հանրային առողջապահական հիմնախնդիր է, վարակելիության ցուցանիշը ընկալունակ բնակչության շրջանում ավելին է, քան 90%-ը: Վերջին 15 տարվա ընթացքում ջրծաղիկի տարեկան հիվանդացությունը միջինում կազմել է 15000 եւ տատանվել է, պարբերականությամբ կրկնվել, աճել է»,-«Արմենպրեսի» մամուլի սրահում կայացած ասուլիսում նշեց Հիվանդությունների վերահսկման եւ կանխարգելման ազգային կենտրոն գլխավոր տնօրենի տեղակալ Զարուհի Գրիգորյանը:
Զարուհի Գրիգորյան
Նրա խոսքով, Հայաստանի Հանրապետությունը որոշում է կայացրել Հայաստանի պատվաստումային օրացույցում ներառել ջրծաղիկի դեմ պատվաստանյութը եւ եւս մեկ վարակիչ հիվանդություն դարձնել կառավարելի:
Սվետլանա Գրիգորյան
«Ջրծաղիկի դեմ պատվաստանյութը բավականին անվտանգ եւ արդյունավետ պատվաստանյութ է: Դեռեւս 1970-80-ական թվականներին այն սկսեց լիցենզավորվել ու շատ երկրներում կիրառվել: Նման երկրներից են Ճապոնիան, ԱՄՆ-ն, Գերմանիան, եվրոպական տարածաշրջանի այլ երկրներ: Կիրառելով պատվաստանյութը՝ նրանք կարողացել են կառավարել այնպիսի հիվանդություն, ինչպիսին ջրծաղիկն է: Ջրծաղիկի դեմ պատվաստանյութի կիրառման ցուցումները նույնն են, ինչպես ցանկացած պատվաստանյութի դեպքում, այսինքն` այն կարող է կիրառվել, եթե մարդը չունի որեւէ սուր հիվանդություն տվյալ պահին կամ խրոնիկ հիվանդության սրացում, հիմնականում հակացուցված է իմունային անբավարարություն ունեցող անձանց համար»,-հավելեց Հիվանդությունների վերահսկման եւ կանխարգելման ազգային կենտրոնի իմունականխարգելման եւ կառավարելի վարակիչ հիվանդությունների համաճարակաբանության վարչության պետ Սվետլանա Գրիգորյանը:
Հավելեց, որ պատվաստումից հետո կարող են լինել ջերմության կարճատեւ բարձրացում, ներարկումային տեղի ցավ, ընդհանուր թուլություն, անհանգստություն, որոնք կարճատեւ են եւ առանց որոշակի բուժման կարող են անցնել:
Կարդացեք նաև
Մանրամասն՝ տեսանյութում.
Գոհար ՀԱԿՈԲՅԱՆ
