«Նիկոլ Փաշինյանը գործարքի է գնացել Էրդողանի հետ ու իրականացնում է թուրքական նախապայմանները. առաջինը՝ Արցախը Ադրբեջանին հանձնելն էր, հիմա անցել է ցեղասպանության ժխտման քաղաքականությանը: Ցավոք սրտի, կա նաեւ երրորդ նախապայման. Նիկոլ Փաշինյանը իրագործում է Հայաստանը Արեւմտյան Ադրբեջանի վերածելու քաղաքականությունը»,-այսօր Մաշտոցի պուրակում տրանսպորտի սակագների դեմ բոյկոտի թեմայով ասուլիսի ժամանակ մի փոքր շեղվելով թեմայից՝ հայտարարեց «Մայր Հայաստան» դաշինքի առաջնորդ Անդրանիկ Թեւանյանը:
Նա հայտնեց, որ փետրվարի 1-ից իրականացնում են բոյկոտի քարոզը, ներգրավված են այդ գործընթացում եւ արձանագրել են, որ մարդիկ հիմնականում միանում են այդ բոյկոտին. «Մենք համոզված ենք՝ եթե քաղաքացիները որոշեն, որ չեն համակերպվելու այդ թանկացման հետ, ապա թանկացումները կչեղարկվեն»:
Ըստ Թեւանյանի իրենց հարցումների համաձայն այս իշխանություններն ունեն 8-10 տոկոս աջակիցներ ու այդ 8-10 տոկոսի մեջ կարող են լինել մարդիկ, որոնք ասում են՝ ուզում են վճարել 150 դրամ. «Բայց ճնշող մեծամասնությունը բոյկոտում է: Սա միայն մեկ ուժի կամ առանձին հոսանքների խնդիր չէ: Եթե քաղաքացիները միասնական որոշում կայացնեն ու բոյկոտեն, կունենանք այն արդյունքը, որին ձգտում ենք»:
Կարդացեք նաև
Անդրադառնալով Տիգրան Ավինյանի այսօրվա հայտարարությանը, թե «Տարատեսակ քաղաքական շոուները պետք է ունենան իրենց վերջնակետը հասարակական տրանսպորտում, եւ այդտեղ էլ մենք պետք է որոշակի գործուն ջանքեր գործադրենք»՝ Թեւանյանն ասաց. «Պոպուլիզմից Նիկոլ Փաշինյանի թիմը թող չխոսի, իրենց արտաամուսնական փոդքասթով իրենց շոուները թող կազմակերպեն: Երբ գնում են ծնունդը ամերիկյան տարածքում նշելու, թող հիշեն նախկինում՝ ինչով են զբաղված եղել… «Քաղաքացիական պայմանագիր» կոչվածը թող շոուներից չխոսի: Իսկ երբ ասում են 100 դրամին վերադարձ չի լինելու, հիշում եք, թե ինչ կրկեսային ներկայացում տեսանք, երբ հայտարարում էին՝ 150 դրամ հնարավոր չէ: Մեկ օր հետո ճնշումներից վախենալով՝ վերադարձան 150 դրամին: Հիմա, երբ մեր քաղաքացիները նույն ճնշումը շարունակեն, սրանք ստիպված են լինելու վերանայել»:
Արփինե ՍԻՄՈՆՅԱՆ
