Ա. Խ.-ն դիմել էր ՀՀ վարչական դատարան, ապա անցել դատական երկու ատյաններով: ՀՀ վճռաբեկ դատարանը հունվարի 27-ին կայացրեց որոշում:
Ա.Խ.-ն պահանջել էր վերացնել կոմիտեի իրավաբանական վարչության պետի 2022 թ. նոյեմբերի 11-ի որոշումը: ՀՀ վարչական դատարանը հայցը բավարարել էր, կոմիտեի վերաքննիչ բողոքը մերժվել էր: Վճռաբեկ բողոք էր ներկայացրել ՀՀ պետեկամուտների կոմիտեն:
Կոմիտեն հայտնել էր, որ վերաքննիչ դատարանի կողմից չեն ուսումնասիրվել գործում ներկայացված ապացույցները, ինչպես նաեւ կոմիտեի փաստարկները սխալ են մեկնաբանվել:
Վճռաբեկ բողոքում, ՀՀ պետեկամուտների կոմիտեն հայտնել էր, որ մաքսանենգության դեմ պայքարի վարչության «Զվարթնոց» բաժնի գլխավոր մասնագետի կողմից կազմված անձնական մաքսային զննման ակտի համաձայն, Ա.Խ.-ն կամավոր հանձնել է իր գրպանում առկա սպիտակ պոլիէթիլային թափանցիկ թաղանթով փաթեթավորված երկու փաթեթ, որում եղել են քառասունմեկ ադամանդի նմանվող եւ երեսունյոթ փոքր քարեր: Տիկինը Դուբայով էր եկել Հայաստան…
Կարդացեք նաև
Նշանակվել էր ապրանքագիտական համալիր փորձաքննություն: Պարզվել էր՝ քարերը համարվում են բնական ադամանդներ: Ա.Խ-ն ճանաչվել էր զանցառու:
Վճռաբեկ դատարանի գնահատմամբ. «Հայցվորն իր մոտ ունենալով հայտարարագրման ենթակա ապրանքներ, դրանք անտեսանելի վայրում պահելով, հատել է «Կանաչ ուղի» գիծը, որպիսի փաստն արդեն իսկ բավարար է, հաստատված համարելու, որ հայցվորն, ըստ էության, ապրանքների հայտնաբերումը դժվարացնող միջոցով փորձել է թաքցնել իր մոտ առկա թանկարժեք քարերը»:
Վճռաբեկ դատարանը ՊԵԿ-ի բողոքը բավարարել է, բեկանել ՀՀ վերաքննիչ վարչական դատարանի որոշումը, մերժել Ա.Խ.-ի հայցը:
Գործով զեկուցողն էր նախագահողը՝ Հ. Բեդեւյանը:
Գրեթե նույնանման գործ էր քննել եւ որոշում կայացրել Վճռաբեկ դատարանը նույն օրը, դարձյալ ՊԵԿ-ի բողոքի հիման վրա:
Վ.Ա.-ն նույնպես հատել էր օդանավակայանի «Կանաչ ուղին»: Նրա գոտկատեղից կապված վիճակում զարդեր էին հայտնաբերվել:
Նա հայտնել էր, որ դրանք անձնական նպատակներով են ձեռք բերվել, մտադիր չի եղել վաճառել, եւ չի իմացել, որ դրանք ենթակա են հայտարարագրման, անձամբ է մատնացույց արել դրանց գտնվելու վայրը: Նա հրաժարվել էր ստորագրել ակտը:
Վ.Ա.ն էլ եկել էր Ստամբուլից: Նրա մոտ կար մեկ թեւնոց, երկու վզնոց, իրար միացված «դեղին մետաղական շղթաներ»:
Դարձյալ շահել էր ՊԵԿ-ը, բեկանվել էր ՀՀ վերաքննիչ դատարանի որոշումը:
Ռուզան ՄԻՆԱՍՅԱՆ
«Առավոտ» օրաթերթ
01.02.2025
