Aravot.am-ը Հայոց ցեղասպանության թանգարան-ինստիտուտի տնօրեն Էդիտա Գզոյանից հետաքրքրվեց՝ Հայոց ցեղասպանության թանգարան-ինստիտուտը մտադիր չէ՞ արձագանքել Նիկոլ Փաշինյանի հայտնի հայտարարություններին, որոնք նա արել էր Շվեյցարիայի հայության մի խմբի հետ հանդիպման ժամանակ, եւ որոնց վերաբերյալ հայտարարություն էր տարածել նաեւ Լեմկինի ցեղասպանությունների կանխարգելման եւ մարդկային անվտանգության ինստիտուտը: Լեմկինի ինստիտուտի հայտարարության մեջ մասնավորապես էր, որ Փաշինյանի կողմից ցեղասպանության ժխտողականությանը մոտ հայտարարություններ անելը կարող է վտանգավոր հետեւանքներ ունենալ՝ Հայաստանի դեմ թշնամական գործողությունների ուժեղացման տեսանկյունից։
«Ես այսօր տեսա, որ վարչապետը մեկնաբանել է իր ասածը, կարծեք թե բացատրել է, թե ինչ էր ուզում ասել: Ես հասկանում եմ, որ Հայոց Ցեղասպանության թեման հայերի համար զգայուն է, եւ միշտ բուռն արձագանքների է արժանանում, բայց մյուս կողմից ցավում եմ, որ հարցը շատ են քաղաքականացնում, ու նման վիճակներում ենք հայտնվում»,- ասաց Էդիտա Գզոյանը:
Մեր դիտարկմանը, որ բարձրաստիճան պաշտոնյաները, երկրի առաջին դեմքերը եւ հայտնի անհատները մի՞թե չպետք է զուսպ արտահայտվեն եւ անզգույշ արտահայտություններ չանեն Հայոց ցեղասպանության թեմայով, որ հետո նրանց ասածները չհայտնվեն ադրբեջանական մամուլի էջերում, Հայոց ցեղասպանության թանգարան-ինստիտուտի տնօրենն այսպես արձագանքեց. «Հայոց ցեղասպանության ժխտում Հայաստանում չի կարող լինել: Մենք ամբողջ օրը փորձում ենք եւ կրթական ծրագրերով դպրոցականների հետ աշխատել, եւ ծրագիր ենք մտածում լրագրողների հետ աշխատելու համար, շատ հաճախ էլ ԱԳՆ դիվանագիտական դպրոց ենք գնում, իրենց ենք ներկայացնում թեման:
Բոլորս պետք է գիտակ լինենք, շատ զգույշ խոսենք ու արտահայտվենք: Մենք որպես ինստիտուտ, որպես գիտական հաստատություն՝ միշտ նման հարցերի անդրադառնում ենք, կարծում եմ՝ բոլորս պիտի զգուշավոր լինենք ու թույլ չտանք, որ մեր քննարկումները մեր թշնամիներին հաճույք պատճառեն: Հաստատ այդ ամենն ի բարօրություն մեր երկրի չի ծառայում»:
Կարդացեք նաև
Գոհար ՀԱԿՈԲՅԱՆ
