Այսօր հրավիրած ասուլիսում Նիկոլ Փաշինյանն անդրադարձավ ԱՄՆ Պետդեպարտամենտի գաղտնազերծած փաստաթղթերին, որոնք վկայում են՝ «90-ականների վերջին Ռոբերտ Քոչարյանն ու Հեյդար Ալիեւը տետ ա տետ՝ առանց միջնորդների, համաձայնության էին եկել լուծել Ղարաբաղյան խնդիրը տարածքների փոխանակմամբ` Մեղրին Ղարաբաղի դիմաց»:
«Այդ նյութն ինչի՞ մասին էր, նրա մասին էր, ինչի մասին ես վերջերս խոսեցի եւ դա դարձավ առիթ, որ ես նախկին երեք նախագահներին բանավեճի հրավիրեմ։ Ըստ էության, այդ ամբողջ նյութն այդ բանավեճի մասին էր։ Եվ ես նույնիսկ չեմ ալարել, մի մեջբերում եմ արել այդ փաստաթղթից, որը հիմա ուզում եմ կարդալ։ Ասում է՝ փոխպետքարտուղար Թալբոթն արձագանքել է՝ այդ տարբերակը կարող է շեղել հակամարտող կողմերին Մինսկի խմբի առաջարկներից, և ոչ թե լուծել, այլ՝ է’լ ավելի խճճել խնդիրը։ Աշխարհի տարբեր անկյուններում փորձը ցույց է տալիս, որ սահմանների փոփոխությունը նման է Պանդորայի արկղ բացելուն. Ղարաբաղի դեպքում այն լավագույն դեպքում փակուղի կմտցնի հարցը, վատագույն դեպքում՝ կհանգեցնի բռնությունների»։
Ըստ Փաշինյանի՝ այս մեջբերումն այն մասին է, որ 1999 թվականին ԵԱՀԿ Մինսկի խմբի համանախագահողն ասում է, որ Ղարաբաղի հարցը պետք է լուծվի առանց սահմանների փոփոխության։ Փաշինյանն ասաց, որ դա այն է, ինչի մասին ինքն էլ է ասել։ «Երկրորդ դիտարկումը, որի մասին տասնյակ անգամներ ասել եմ՝ առաջարկվում է Մեղրին տալ, Ղարաբաղը վերցնել։ Իմ թեզը ո՞րն է՝ եթե դուք ասում եք, որ իրենք Ղարաբաղը չեն ճանաչել Ադրբեջանի կազմում, բա ինչո՞ւ եք ՀՀ ինքնիշխան տարածքի մասը տալիս Ադրբեջանին, որ Ղարաբաղը վերցնեք»,- ասաց նա։
Փաշինյանը հավելեց, որ այլեւս բանավեճի չի հրավիրում երեք նախագահներին, քանի որ բանավիճելու թեմա չկա արդեն։
Կարդացեք նաև
Մանրամասները՝ տեսանյութում
Ռոզա ՀՈՎՀԱՆՆԻՍՅԱՆ
