«Իբրեւ արտաքին գործերի նախարար առաջին անգամ եմ այստեղ, բայց սա իմ առաջին այցը չէ Երեւան: Ես եղել եմ այս գեղեցիկ քաղաքում եւ վստահ եմ, որ բազմաթիվ այլ հնարավորություններ դեռ կընձեռվեն, մեծ պատիվ կունենամ ձեզ հյուրընկալելու նաեւ Վրաստանում»,- ՀՀ արտգործնախարարությունում կայացած՝ ՀՀ արտաքին գործերի նախարար Արարատ Միրզոյանի եւ Վրաստանի արտաքին գործերի նախարար Մակա Բոճորիշվիլի համատեղ ասուլիսի ժամանակ ասաց նախարար Բոճորիշվիլին:
«Մեր ռազմավարական գործընկերությունը հիմնված է բարեկամության, դարեր շարունակ ունեցած մեր սերտ հարաբերությունների, համագործակցության վրա, որոնք մեզ կապում են, այդ հիմքերը ամուր են մեր երկու ազգերի եւ երկրների միջեւ: Անշուշտ, այն շրջանակը, որը մենք արդեն իսկ անվանել ենք ռազմավարական գործընկերություն, նորանոր հնարավորություններ է ընձեռում է՛լ ավելի սերտացնելու մեր հարաբերությունները բոլոր ուղղություններով:
Հայաստանն ավանդաբար մեր լավագույն 10 տնտեսական գործընկերների ցանկում է, մենք է՛լ ավելի մեծ հնարավորություններ ունենք մեր տնտեսական համագործակցությունը զարգացնելու: Մենք տեսնում ենք, որ շատ մեծ է միտումը զբոսաշրջության ոլորտում, շատերն են այցելում Վրաստան, եւ մենք անչափ ուրախ ենք լինում հյուրընկալելու նրանց»,-հավելեց Վրաստանի արտգործնախարարը:
Ի թիվս այլնի՝ նա խոսեց միջկառավարական նիստից, որը կնախագահեն երկու երկրների վարչապետները, կարեւորեց նաեւ միջկառավարական տնտեսական հանձնաժողովի աշխատանքները՝ երկկողմ հետաքրքրությունների առումով: Անդրադարձ եղավ նաեւ տարածաշրջանում ընթացող գործընթացներին:
Կարդացեք նաև
Վրաստանի արտաքին գործերի նախարար Մակա Բոճորիշվիլին մասնավորապես նշեց. «Վրաստանն այս տարածաշրջանում խաղաղություն եւ կայունություն տեսնելու անկեղծ ցանկություն ունի։ Եվ մենք պատրաստակամ ենք անելու այն ամենը, ինչ կարող ենք՝ հասնելու համար այդ նպատակին, վստահ լինելու համար, որ մեր տարածաշրջանը կայուն է, խաղաղ եւ բարգավաճում է։
Հուսանք՝ խաղաղության պայմանագիրը Հայաստանի եւ Ադրբեջանի համար կամփոփվի այնպիսի դրույթներով, որ երկուստեք ընդունելի կլինեն։ Սա կարող է հիմք հանդիսանալ այս տարածաշրջանի կայունության, կայուն խաղաղության հասնելու համար։ Մեր տարածաշրջանի ներուժն օգտագործելու համար պետք է հիմնվել հենց այս հիմքի վրա: Այսպիսով, մենք պատրաստ ենք համագործակցելու մեր հարեւանների հետ»,- նշեց Վրաստանի արտաքին գործերի նախարարը։
Բոճորիշվիլին խոսեց նաեւ իր ձեւակերպմամբ՝ Ռուսաստանից եկող մարտահրավերներից, ասաց, որ Ռուսաստանը բռնազավթել է Վրաստանի որոշ շրջաններ, ինչը մնում է ծանր խնդիր իր երկրի համար: Վրաստանի ԱԳ նախարարը նաեւ ընդգծեց, որ Հայաստանն ու Վրաստանը հաստատապես հարգում են միմյանց ինքնիշխանությունն ու տարածքային ամբողջականությունը՝ թե երկկողմ, թե բազմակողմ հարթակներում։
Մանրամասն՝ տեսանյութում.
Գոհար ՀԱԿՈԲՅԱՆ
