Երևանի ընդհանուր իրավասության դատարանի Շենգավիթի նստավայրում դատավոր Դավիթ Բալայանի նախագահությամբ այսօր շարունակվում է ՊՎԾ նախկին պետ Դավիթ Սանասարյանի գործով դատական նիստը: Այսօր եւս շարունակվում է Սանասարյանի հարցաքննությունը:
Դավիթ Սանասարյանն այսօր էլ պնդեց, որ գործով անցնող մեղադրյալների հարազատները եկել են իր մոտ ու ասել, որ նման խնդիր է դրված՝ գրեք Սանասարյանի վրա, ազատ կարձակվեք:
Մեղադրող դատախազը հետաքրքրվեց՝ ո՞վ է կոնկրետ ասել նման բան: Սանասարյանն ասաց՝ այդ հարցին արդեն պատասխանել է, հիմա չի պատասխանի:
-Կիսատ եք տալիս ցուցմունք: Եթե տեղեկություն ունեք, մինչեւ վերջ ասեք, կամ մի ասեք: Եթե մի բան ասում եք, այդ հայտարարությունը պետք է վստահելի լինի,- ասաց նիստը նախագահող դատավորը:
Կարդացեք նաև
Սանասարյանն էլ շարունակեց, թե մեղադրող դատախազը, եթե գործին ուշադիր ծանոթացել է, ապա կհիշի՝ ինքը նախաքննության ժամանակ էլ է ասել, որ Սամվել Ադյանի հայրը եկել է իր մոտ, ասել է այդ տեղեկությունը, հետո հրաժարվել իր ասածից:
-Ձեր նշած հայրը ոչ միայն նախաքննության ժամանակ է հերքել Ձեր այդ ասածը, այլեւ այս նույն դատական նիստերին էլ է հերքել,- արձագանքեց դատախազը:
-Չի պատասխանել, ոչ թե հերքել է,- ուղղեց Սանասարյանը:
Մեղադրող դատախազն էլ տվեց հաջորդ հարցը՝ մեջբերելով Սանասարյանի այն պնդումը, որ գործով մեղադրյալները, լինելով բիզնեսմեն, վախ են ունեցել իրենց բիզնեսների համար, այդ պատճառով են ոչ ճիշտ տեղեկություններ հայտնել: Մեղադրող դատախազը հարցրեց՝ ի վերջո ասացիք՝ այդ մարդիկ բիզնեսմեններ են, այդ դեպքում ինչո՞ւ եք տարել նրանց, մտցրել ՊՎԾ:
-Չեմ իմացել ի սկզբանե այդ մասին: Խաչատրյան Գեւորգը մտածել եմ փորձագետ է: Այդ ժամանակ Սամվելի ու Գեւորգի անունով բիզնես գոյություն չի ունեցել: Ես որեւէ մեկին, եթե իմանայի բիզնեսմեն է, չէի տանի, իսկ թե այդ ժամանակ նրանց ընտանիքը ՌԴ-ում բիզնես է ունեցել, այդ հանգամանքը չի խանգարել ինձ նրանց պաշտոնի նշանակելու համար,- պատասխանեց Սանասարյանը:
Հետո հավելեց, որ մեղադրյալները՝ Սամվելն ու Գեւորգը, ահագին գործ են արել, պետությանն ահագին օգուտ են տվել. «Բացասական եմ վերաբերվում, որ իրենք փորձ են արել իրենց շահը մտցնել այդ ամենի մեջ: Փաստերն են այդ մասին խոսում, ես չէ, որ պետք է ասեմ»:
Մեղադրող դատախազը շարունակեց հարցերը՝ Սամվել Ադյանն իր ցուցմունքում հայտնել է, որ դեռեւս 2018 թվականի վերջերից մասնակցել են տուբերկուլյոզի ազգային կենտրոնի կողմից հայտարարված մրցույթին, որից հետո մտել է ձեր աշխատասենյակ, եւ այդ պահին զրուցելիս եք եղել այն ժամանակվա առողջապահության նախարար Արսեն Թորոսյանի հետ, հայտնել եք, ըստ Ադյանի ցուցմունքի, թե «Զորաշենը» մեր Սամոյի ֆիրման է, իսկ հավաստագրերը նորմալ են: Այս խոսակցությունը ի վերջո եղե՞լ է, թե՞ չի եղել:
-Այդ խոսակցությունն ուրիշ ձեւով է եղել, Արսեն Թորոսյանն ինձ զանգել է, ասել է՝ մի հատ թղթի խնդիր կա, քո տղերքից մեկը սենց ֆիրմա ունի, մասնակցում է, ասում եմ՝ ո՞նց, ո՞ւմ աշխատողը: Կանչեցի Սամվել Ադյանին: Հարցրեցի՝ դու կապ ունե՞ս որեւէ ձեւով, ասել է՝ չէ, ես կապ չունեմ, նույնը պատասխանել եմ Թորոսյանին: Ասաց՝ լավ իմ ձեւով կճշտեմ,- պատասխանեց Սանասարյանը:
Մեղադրող դատախազն էլ նկատեց, որ այս նույն բովանդակության ցուցմունք է տվել նաեւ Արսեն Թորոսյանը ու հարցրեց՝ ինչո՞վ կպայմանավորի նրանց ցուցմունքի լրիվ նույնությունը:
-Ուզո՞ւմ եք քաղաքական հայտարարությո՞ւն անեմ, չեմ անի: Արսեն Թորոսյանն էլ շատ քրեական գործերով անցնում է, դա գիտեք՝ ոնց են կազմակերպում,- արձագանքեց Սանասարյանը:
-Այսինքն՝ պնդում եք, որ Արսեն Թորոսյանից սուտ ցուցմո՞ւնք են կորզել, – հետաքրքրվեց նիստը նախագահող դատավորը:
-Այո՛,- պատասխանեց Սանասարյանը:
Հիշեցնենք, որ Սանասարյանին մեղադրանք էր առաջադրվել պաշտոնեական լիազորությունները չարաշահելու համար։ Ըստ մեղադրանքի՝ Սանասարյանը նպաստել է իր աշխատակիցների կողմից փաստացի կառավարվող ընկերության ձեռնարկատիրական գործունեությանը։
Արփինե ՍԻՄՈՆՅԱՆ
