«Ես Սեյրան Օհանյանին չեմ մեկնաբանի, որովհետեւ Սեյրան Օհանյանը դեռ պետք է մեկնաբանի իր պաշտոնավարման ընթացքում բանակի տկարացման քայլերը ինչպիսին են եղել»,- այսօր Եռաբլուրում հայտարարեց ԱԺ պաշտպանության մշտական հանձնաժողովի ՔՊ-ական նախագահ Անդրանիկ Քոչարյանը՝ պատասխանելով լրագրողների հիշեցմանը, որ Սեյրան Օհանյանն ասաց, որ հակամարտությունն ավելի է խորացել, եւ վստահություն չկա: Դրանից հետո բվականին հետաքրքիր հարց ու պատասխան ծավալվեց իշխանական պատգամավորի եւ չորրորդ իշխանության ներկայացուցիչների միջեւ:
–Սեյրան Օհանյանը նաեւ ասաց, որ իր պաշտոնավարման ընթացքում ժանգոտած եւ ժամկետանց զենքեր երբեք ձեռք չեն բերվել:
-Բազմաթիվ քրեական գործեր ուրիշ բանի մասին են խոսում:
–Նիկոլ Փաշինյանն ասում է, որ Երրորդ Հանրապետության պատմության մեջ մեր ամենամեծ սխալներից է եղել բանակի սրբագործումը, սրբադասումը: Սա ուղիղ հակադրության մեջ չի՞ մտնում Սպարապետ, մեր բանակի հիմնադիր Վազգեն Սարգսյանի խոսույթի հետ, որը հորդորում էր սրբության սրբոցի, երեխայի պես վերաբերվել բանակին:
Կարդացեք նաև
-Այո, պետք է հենց այդպես էլ վերաբերվենք: Եթե այդպես չվերաբերվենք, բանակը չի լինի էնպիսին, որպեսզի պաշտպանի մեզ, յուրաքանչյուրիս՝ մեր երկիրը եւ նրա յուրաքանչյուր քաղաքացուն:
-Իսկ այդ դեպքում ինչո՞ւ Ազգային ժողովում չընդդիմացաք, երբ որ Նիկոլ Փաշինյանը ԱԺ ամբիոնից դա հայտարարում էր:
-Ես որտեղ որ պետք է, գտնում եմ տարբերակներ՝ իմ կարծիքը հնչեցնելու: Նաեւ ձեզ, չնայած, ձեզ պետք է չտայի: Այսօր եկեք խոսենք բանակի օրվա մասին, ինչպես ստեղծվեց, ինչ հաջողություններ ունեցանք եւ ինչ անհաջողություններ ունեցանք, էսօր ինչ ենք անում, որպեսզի էդ անհաջողությունները շտկվեն: Բանակի ամրությունների մասին խոսենք: Դրա մասին չեք խոսում:
-Վազգեն Սարգսյանն էր ասում, որ եկեք դավաճան չփնտրենք յուրայինների մեջ: Մենք ունենք մի թշնամի եւ պետք է կենտրոնանանք թշնամու ուղղությամբ: Այսօր մեր թշնամիները նույնն են:
-Բայց բանակի առջեւ դրված խնդիրներն են փոխվել: Բանակը 94-ից հետո լրիվ այլ վիճակի էր բերված: Իսկ վաղվա բանակը պետք է լինի էնպիսին, որպեսզի նման խնդիրներ չառաջանան, ինչի առաջ մենք կանգնեցինք 44-օրյա պատերազմի արդյունքում:
-Ձեր իշխանությունները ի՞նչ են անում մարտունակ բանակ կառուցելու համար:
-Դուք բյուջեի քննարկումը լուսաբանե՞լ եք: Դուք չե՞ք տեսնում թվերի փոփոխությունը: Էդպիսի թվեր երբեք չենք ունեցել, եւ ամեն տարի էդ թվերը մեծանում են: Այսօր պետք է մտածենք այդ միջոցները էֆեկտիվ ծախսելու եւ մեր կարողությունները ավելացնելու մասին:
-Թվերը մեծանում են, բայց մեր հողերը փոքրանում են: Թշնամին ներխուժում է մեր տարածք, չենք կարողանում հետ բրդել:
-Ուզում եք հիմա բրդե՞նք:
-Չէ, ուզում ենք հետ շպրտենք: Ինչպե՞ս եք պատկերացնում ՀԱՊԿ-ի հետ մեր հետագա համագործակցությունը: Մնալո՞ւ ենք, չե՞նք մնալու:
-Քաղաքական իրողությունները կթելադրեն մեր քայլերը: Դուք մի անհանգստացեք: Մենք պետք է էսօր մտածենք էն խորհուրդի մասին, որը մեզ բոլորիս բերել է այստեղ: Այստեղ՝ Եռաբլուրում էլ զորք կա, բայց գետնի տակ, իր Սպարապետի գլխավորությամբ: Հիմա վերեւում էլ պետք է ունենանք էն զորքը, որի հիմքերը դրել է Սպարապետը իր զորքով: Այստեղի զորքը նաեւ արձանագրել է շատ մեծ հաջողություններ: Նաեւ Եռաբլուրը բաժանված է մի քանի մասի: Մենք ունենք նաեւ անհաջողությունների հատված: Հաջողություններն ու անհաջողությունները մեկը մյուսին փոխարինում են: Մենք պետք է կառուցենք էն բանակը, որը միայն մեզ կպահի ամուր դիրքերում:
-Ձեզ համար ընդունելի՞ է, որ սահմանազատումը շարունակում ենք հենց Տավուշից:
-Ինձ համար ընդունելի է՝ ընդհանրապես սահմանազատումը սկսել եւ ավարտել: Հատվածական խնդիրները պրոբլեմ չեն: Պրոբլեմը՝ որ ընթացքը հանկարծ չկասեցվի: Վերջին հաշվով 24 թվականի ամենաէական, շոշափելի ձեռքբերումը ո՞րը կարող եք համարել: Մենք համարյա չենք կրակել, չէ՞, մեկս մյուսի վրա: Բայց ամեն մի խաղաղ օրը մենք լա՞վ ենք օգտագործել նույն բանակի հիմքերը ավելի ամրացնելու տեսանկյունից, մեկս մյուսին հանդուրժելու տեսանկյունից: Չէ: Էստեղ տարաբնույթ հարցեր են լինում: Բայց էսօրվա խորհուրդը լրիվ այլ է, էսօրվա խորհուրդը միավորող խորհուրդ պետք է լինի, էն, ինչը դրվել է 90-ականներին եւ 94-ին դարձել է էն հիմքը, որը հակառակորդին պարտադրել է գնալ հրադադարի: Ինչից՝ ինչ ունեցանք, հետո ինչից՝ ինչ դարձանք: Հետո, բնականաբար, ճոճանակը շարժվել է տարբեր ուղղություններով: Էսօր մենք էդ ճոճանակի շարժը պետք է բարձրացնենք դեպի վերեւ՝ ի նպաստ մեր երկրի անվտանգության:
-Հատուկ նշանակության ջոկատները հիմա մոբիլ խմբերի վրա են շատ մեծ ակցենտ դնում: Մենք մեր զինված ուժերի բարեփոխումների շրջանակներում ե՞ւս այդ ակցենտը դնում ենք:
-Այո: Այսպես ասենք. ժամանակակից բանակները հատուկ նշանակության տրամաբանության մեջ գործող բանակներ են, անկախ նրա մեծությունից, թվաքանակից: Այսինքն, փոքր կառույցներ՝ մեծ խնդիրներ լուծելու համար: Դա նշանակում է, որ պետք է ունենալ ժամանակակից սպառազինություն եւ դա կիրառելու համար լավ գիտելիքներ ունեցող զինվորականություն: Դա է մեր նպատակը, դա է մեր քաղաքականությունը: Դա շատ բարդ ճանապարհ է, որով մենք անցնում ենք:
-Մենք որ կարողացանք ՍՈՒ 30 գնել, ինչի՞ Նիկոլ Փաշինյանը չէր ասում ա՛յ, մեզ զենք չեն վաճառում:
-Դուք չհասկացա՞ք, որ օդը շատ կարեւոր է ժամանակակից պատերազմներում: Եվ ՍՈՒ 30-ները այդ նպատակի համար են ձեռք բերվել: Ուրիշ բան, մենք այդ պահին ճի՞շտ գնում ենք արել, թե չէ: Բայց դա այլ խնդիր է: Դրա մասին քննիչ հանձնաժողովում եւ խոսակցություն է եղել, եւ պարոն Փաշինյանը արձանագրել է, որ ես հատուկ զեկույց ուղարկել եմ, երբ որ նոր ենք եկել իշխանության, ՍՈՒ 30-ների ձեռք բերման վերաբերյալ:
-Մեր բանակի հաղթանակների համար պարտական ենք նաեւ այն գեներալներին: Գեներալ Մանվել Գրիգորյանը վարկաբեկվեց այս իշխանությունների օրոք: Չնայած, դուք հոգեհանգստին մասնակցում էիք: Բայց այսօր այլ գեներալների նկատմամբ…
-Ես ոչ միայն մասնակցել եմ, այլեւ ես ասել եմ, որ չի կարելի ուրանալ յուրաքանչյուրի արածը այդ հաղթանակների կերտման ճանապարհին: Հետո կյանքը որ ուղղությամբ զարգացավ, դրանք այլ խնդիրներ են:
Աշոտ ՀԱԿՈԲՅԱՆ
