Հունվարի 24-ին դեսպան Տիգրան Բալայանը Բելգիայի Ներկայացուցիչների պալատում մասնակցեց ցեղասպանության զոհերի հիշատակին նվիրված ոգեկոչման հանդիսավոր միջոցառմանը, որը հաջորդում է 2020թ․ դեկտեմբերին Պալատի կողմից ընդունված բանաձևին, որով Բելգիայում սահմանվել է պաշտոնապես ճանաչված ցեղասպանությունների հիշատակի ազգային օր:
Միջոցառմանը ելույթ ունեցան Բելգիայի Ներկայացուցիչների պալատի նախագահ Պիտեր Դը Ռուվերը և 2020թ․ բանաձևի հեղինակ Միշել Դը Մաղդը, ներկա էր նաև փոխվարչապետ, արդարադատության և Հյուսիսային ծովի նախարար Փոլ Վան Թիխելտը: Բանախոսներն ընդգծեցին հիշողության, զգոնության և գլոբալ համագործակցության կարևորությունը ապագա ցեղասպանությունների կանխարգելման գործում:
Լրագրողները և ցեղասպանագետները ելույթ ունեցան «Ինչպես կոտրել բռնության ցիկլը» և «Ցեղասպանության առջև զգոն լինելու պարտականությունը. ճանաչելով նախազգուշացնող նշանները» թեմաների շուրջ։
Միջոցառումը կարևորեց ցեղասպանության զոհերի հիշատակը հարգելու, անպատժելիության դեմ պայքարի և ապագա ոճրագործությունները կանխելու միջազգային ջանքերն ամրապնդելու շարունակական հանձնառությունը:
Կարդացեք նաև
ՀՀ ԱԳՆ
