Հայոց բանակի կազմավորման օրվա առթիվ այսօր Եռաբլուր զինվորական պանթեոն էին այցելել Նիկոլ Փաշինյանն ու նրան ուղեկցող պաշտոնյաները։ Փաշինյանը Եռաբլուր էր այցելել անվտանգության մեծաթիվ աշխատակիցներով, նրա այցելության պահին սահմանափակվել է ինչպես լրագրողների, այնպես էլ զոհված զինծառայողների ծնողների տեղաշարժը։
Մանրամասները՝ տեսանյութում
44-օրյա պատերազմում զոհված հերոս Ալբերտ Հովհաննիսյանի հայրը՝ Արտակ Հովհաննիսյանը լրագրողների հետ զրույցում դժգոհել է, որ իր տեղաշարժը եւս սահմանափակվել է։ «Երբ սահմանափակումներով ես մոտենում տղայիդ շիրիմին, դա է ցավը։ Ուրիշ բան չունեմ ասելու, այս ժողովուրդը պետք է խելքը հավաքի գլուխը, նույնն էլ տվյալ օրվա իշխանությունը։ Ի՞նչ է նշանակում սահմանափակումներով մոտենալ զավակիդ շիրիմին, ես ցանկանում եմ, որ իրենք էլ սահմանափակումներով մոտենան իրենց զավակների շիրիմներին։ Երբեւիցե ես նման արտահայտություն ինձ թույլ չեմ տվել անել, բայց այսօր անելու եմ»,- ասաց Արտակ Հովհաննիսյանը։
Կարդացեք նաև
Նա նշեց, որ ինքը հինգ տարի փորձել է ավելի զուսպ լինել, որպեսզի իրավիճակը չթեժացնի։ «Բայց իրենք են փորձում իրավիճակը թեժացնել, այստեղ շատ ծնողներ կան, ես իմ աչքով եմ տեսել, նաեւ այսօր, որ սահմանափակումներ կային։ Ոչ մեկը չի կարող մեզ սահմանափակել, այնպես չանեն, որ մենք լիքը բաներ սկսենք սահմանափակել։ Ես վախեցնելու լեզվով չեմ խոսում, խոսում եմ իրենց լեզվով»,- հավելեց նա։
Ռոզա ՀՈՎՀԱՆՆԻՍՅԱՆ
