«Երեւանի բնակիչների ընդամենը 12 տոկոս կասկածելի աջակցությամբ քաղաքի կառավարմանը տիրացած ՔՊ եւ Հանրապետություն խմբակցությունները, չանսալով տասնյակ հազարավոր քաղաքացիների բողոքին, որոշել են այժմ հարկադրանքի միջոցներով ներդնել հանրային տրանսպորտի թանկացումը»,- այսօր հրավիրած ասուլիսում ասաց «Հայաքվե» նախաձեռնություն խորհրդի անդամ, տնտեսագետ Հրայր Կամենդատյանը։
Նա նշեց, որ «Հայաքվե» քաղաքացիական միավորումը կանգնում է երեւանցիների կողքին եւ միանում է բոյկոտի գործողություններին։ «Մենք քաղաքացիներին կոչ ենք անում հրաժարվել փետրվարի 1-ից վճարել նոր սակագներով։ Վարչական տույժերի դեպքում դիմել «Հայաքվեի» կենտրոնական գրասենյակ՝ դրանց հատուցման, ինչպես նաեւ հետագա իրավական պաշտպանություն ստանալու համար»։
«Հայաքվե» նախաձեռնության համակարգող Ավետիք Չալաբյանն ասաց․ «Մենք ոչ միայն կոչ ենք անում քաղաքացիներին միանալ բոյկոտի գործողություններին, այլեւ պատրաստ ենք աջակցել նրանց, որպեսզի բոյկոտն արդյունավետ լինի»։
Կարդացեք նաև
«Հայաքվե» նախաձեռնության խորհրդի ու վարչության անդամ, իրավաբան Արամ Պետրոսյանը կոչ արեց քաղաքացիներին, որ իրենց դիմելու դեպքում ներկայացնեն նաեւ վարչական ակտը, որպեսզի կարողանան իրականացնել հետագա իրավական գործողությունները։
Ռոզա ՀՈՎՀԱՆՆԻՍՅԱՆ
