ՀՀԿ երիտասարդական կազմակերպության փոխնախագահ Աշոտ Անդրեասյանն իր դեմ ԱԺ նախագահ Ալեն Սիմոնյանի հայցով դատական նիստից առաջ լրատվամիջոցներին ասաց. «Ամեն անգամ ասել եմ, որ ես իմ ասածների համար չեմ զղջում: Ես իրերը իրենց անունով եմ որակել: Ալեն Սիմոնյանը նեղվել կամ վիրավորվել է, որ ասել ենք «հող հանձնող», «դավաճան», «թուրքի առաջ կզած»: Ես այդտեղ ոչ մի սխալ բան չեմ տեսնում: Թող այնպես ապրեին, որ քաղաքացիներն իրենց համարժեք որակումներ չտային:
Ալեն Սիմոնյանը պահանջում է իրենից ներողություն խնդրել, վիրավորանքների համար ինչ-որ 2,5 մլն. դրամ տուգանք վճարել: Նախ եւ առաջ ես չեմ վիրավորել, իրերը կոչել եմ իրենց անուններով: Եվ երկրորդ՝ ոչ ներողություն եմ խնդրելու, ոչ էլ տուգանք եմ վճարելու, որովհետեւ իրենք իրականում վաճառել են մեր հայրենիքը:
Նիստը վերջնական փուլում է: Երեւի թե դատավորը պետք է որոշում կայացնի: Կանխատեսում անել չեմ ցանկանա: Դատավորը կարող է արդարացի լինել, փորձի կամ ուզենա ճիշտ դատել: Բայց այս իշխանությունների օրոք ոչ մի պետական կառույց չի գործում արդար: Գիտենք, թե ինչպիսի ռեպրեսիաներ են թե ընդդիմադիրների, թե դատավորների վրա, թե դատարաններում ինչ է տիրում, եւ Նիկոլ Փաշինյանն ու իր կինը ինչպես են խառվում բոլոր գործերին: Այնպես որ, կանխատեսում չանենք եւ սպասենք»:
Հարցին, թե ինչո՞ւ է Ալեն Սիմոնյանի ներկայացուցիչը միշտ նրա դատական նիստերը լուսաբանելուց խուսափում, Աշոտ Անդրեասյանը պատասխանեց. «Որովհետեւ նախ ինքնին շատ ամոթ իրավիճակ է Ալեն Սիմոնյանի համար: Չի ուզում լուսաբանվի, որ հանրությունն այդ խայտառակությունը չտեսնի, որ մարդիկ չտեսնեն եւ իրենք էլ իրենց գնահատականները չտան: Եթե ամոթ չլիներ կամ ինքը արդար լիներ, դեմ չէր լինի, որ դատական նիստերը բաց լինեին եւ լուսաբանվեին»:
Կարդացեք նաև
Անդրադառնալով հող հանձնելու վերաբերյալ լրագրողների հարցին Ալեն Սիմոնյանի տված պատասխանին, թե բոլոր մարդիկ սխալվելու իրավունք ունեն, Աշոտ Անդրեսայանը ասաց. «Հասարակ մարդու սխալվելը եւ քաղաքական գործչի, իշխանականի սխալվելը տարբեր բաներ են: Օրինակ, Նիկոլ Փաշինյանի, Ալեն Սիմոնյանի եւ մնացածի սխալից մենք կորցրել ենք հայրենիք, մեր հինգ հազար եղբայրներին ենք կորցրել, Հայաստանի Հանրապետության սուվերեն տարածք ենք կորցրել: Ցանկացած սխալին կա համարժեք պատասխան, որից իրենք չեն խուսափելու»:
Դատական նիստի ավարտից հետո ՀՀԿ երիտասարդական կազմակերպության նախագահ Հենրիխ Դանիելյանը ասաց. «Սա շինծու քրեական գործերի շրջանակներում եւս մեկ շինծու գործ է: Այն շինծու գործերի, որոնց շրջանակներում մեր կուսակցության փոխնախագահ Արմեն Աշոտյանը գրեթե երկու տարի ապօրինի կերպով պահվում է անազատության մեջ: Ոտնահարվում են մարդու իրավունքները եւ պետք է փաստենք, որ Հայաստանում Նիկոլ Փաշինյանի եւ իր իշխանության կողմից չկա մարդու իրավունքները հարգելու ինստիտուտ: Այսօր քրեական գործեր են հարուցում ընդդիմախոսների, այն մարդկանց նկատմամբ, որոնք ընդդիմանում են Նիկոլ Փաշինյանի պարտվողական, թրքասեր քաղաքականությանը:
Այսօր մեր փաստաբանները դատարանում ներկայացրել են ամբողջ ճշմարտությունը, հիմնավորումները տվել, թե Աշոտ Անդրեասյանը ինչի է ասել դավաճան, թափթփուկներ, ինչի է ասել հող հանձնող եք: Իսկ թե դատարանը ինչ կորոշի, չեմ կարող ասել: Կսպասենք ու մեկ ամսից որոշումը կստանանք: Բայց պետք է փաստենք, որ մենք չունենք անկախ դատական համակարգ: Նիկոլ Փաշինյանը ուզուրպացրել է դատա-իրավական համակարգը եւ ուժային կառույցները»:
Իսկ Աշոտ Անդրեասյանի շահերի պաշտպանն ասաց. «Գործի քննությունն ավարտվեց: Փաստաթղթերը եւ գործում առկա այլ տեսագրությունները այսօր հետազոտվեցին, ավարտվեցին: Դատարանը որոշում դեռ չի կայացրել: Դատական ակտը կհրապարակվի փետրվարի 14-ին: Կանխատեսելիության մասին ոչինչ ասել չեմ կարող: Դատավորից ընդհանուր լավ տպավորություն կա: Հուսով եմ՝ օբյեկտիվ դատական ակտ կկայացնի: Երբ կհրապարակվի դատական ակտը, կիմանանք նաեւ որոշման հիմնավորումներն ու պատճառաբանությունները: Միայն դրանից հետո կարող ենք գնահատական տալ դատական ակտի մասով:
Մեր բոլոր ապացույցները ներկայացրել էինք նախորդիվ եւ այսօր այդ ապացույցների հետազոտությունն էր: Փաստաթղթերի տրամաբանությունն այնպես է ներկայացվել, որ փորձել ենք հիմնավորել, որ Աշոտ Անդրեասյանը ինչ բառ ասել է, դրանց հիմքում որոշակի փաստական տվյալներ է ունեցել եւ դրանց հիման վրա գնահատողական դատողություններ է արել կամ իր կարծիքն է արտահայտել, այդ թվում նաեւ բացասական կարծիք: Բայց ուզում եմ անպայման նշել, որ Աշոտ Անդրեասյանի խոսքերն ուղիղ ուղղված չեն եղել Ալեն Սիմոնյանին: Չգտես ինչի իրենք դա իրենց ենք վերագրել: Խոսքերի մեծ ծավալ ուղղված է եղել նիկոլականներին: Ալեն Սիմոնյանին ուղղված արտահայտությունը եղել է «գործ տվող» հասկացությունը, որի հիմքում Աշոտ Անդրեասյանն ունեցել է բազմաթիվ փաստական տվյալներ, մասնավորապես, բազմաթիվ քաղաքական գործիչների եւ լրատվության միջոցների նկատմամբ նրա ներկայացրած բազմաթիվ հայցերը»:
Աշոտ ՀԱԿՈԲՅԱՆ
