«Այսօրվա դատական նիստը բավականին լարված էր եւ տեղեկատվական առումով բավականին հետաքրքիր: Մեղադրյալ Եղիշե Հակոբյանը ցանկություն հայտնեց կոնֆիդենցիալ հանդիպում ունենալ ինձ հետ, եւ դատարանը բավարարեց այդ միջնորդությունը»,-լրագրողների հետ զրույցում նշեց Գեղարքունիքի մարզի Ազատ գյուղում ինժեներասակրավորական վաշտի կացարանում բռնկված հրդեհի հետևանքով մահացած զինծառայողների տուժողների լիազոր ներկայացուցիչ, փաստաբան Նորայր Նորիկյանը: Հավելեց, որ առաջիկա օրերին պատրաստվում է հանդիպել Եղիշե Հակոբյանին:
«Հույս ունեմ, որ Եղիշե Հակոբյանը գործի իրական հանգամանքների վերաբերյալ կտա հանգամանալից տեղեկատվություն, եւ ի վերջո լույս կսփռվի այս ոճրագործության վրա, եւ մենք ձեզ հետ միասին կիմանանք, թե ինչ է եղել իրականում: Առաջիկա օրերին կկազմակերպենք այդ հանդիպումը Եղիշե Հակոբյանի հետ:
Ինչ վերաբերվում է այսօր դատական նիստում տեղի ունեցած մյուս իրադարձություններին, դուք ականատես եղաք, որ հարցաքննվում էր ՀՀ Զինված ուժերի հակահրդեհային անվտանգության ծառայության նախկին պետը, որը բավականին ընդգրկուն ձեւով տեղեկատվություն հաղորդեց դեպքի հանգամանքներին նախորդած ժամանակահատվածի եւ դեպքի իրողությունների վերաբերյալ:
Պարզ դարձավ, որ տառացիորեն նույն զորամասում այս ողբերգությունից 2 ամիս առաջ՝ 2022թ. հոկտեմբերի 28-ին, մարտական դիրքում կրկին բենզինի միջոցով վառարանը վառելու արդյունքում հրդեհվել է մարտական դիրքը, եւ տարբեր աստիճանի այրվածքներ են ստացել որոշ զինծառայողներ:
Կարդացեք նաև
Իմ հարցադրումների հիմնական մեխն այն էր, թե ինչ էր կատարել ՀՀ Զինված ուժերի ղեկավար կազմը կամ պատասխանատու անձինք 2022թ հոկտեմբերի 28-ից մինչեւ 2023թ. հունվարի 19-ի այս ողբերգությունն ընկած ժամանակահատվածում: Ես խորապես համոզված եմ, որ եթե ձեռնարկված լինեին լրջագույն կանխարգելիչ միջոցառումներ, եթե անձնակազմին հրահանգավորեին, եթե պատասխանատուներին պատասխանատվության ենթարկած լինեին, եթե իրականացնեին համապատասխան մասնագիտական եւ հակահրդեհային գործընթացներ, հնարավոր էր, որ մենք այս ողբերգությունից խուսափած լինեինք»,-ընդգծեց փաստաբանը:
Մանրամասն՝ տեսանյութում.
Գոհար ՀԱԿՈԲՅԱՆ
