«Շատ ծանր օրեր ենք ապրում: Այսօր արդեն 2025թ. սկզբին մեր երկրի պետական պարտքը կազմում է 12 մլրդ 560 միլիոնի կարգի, որի մեծ մասը արտաքին պարտքն է: Եթե մինչեւ հիմա որոշակի պարտքերի տոկոսներ էինք վճարում, հիմա արդեն եկել է նաեւ մայր գումարը մարելու ժամանակաշրջանը: Եվ ահա 2025թ հատկապես մի մեծ կլորիկ գումար պետք է վարկի մարմանը տրամադրենք, իսկ պետությունը, պետական բյուջեն փող չունի այդ նպատակի համար »,-«Հայելի» ակումբում նշեց «Հայաստան» խմբակցության պատգամավոր Արմենուհի Կյուրեղյանը։
Պատգամավորի խոսքով. «Այս իշխանությունը վարկերը վերցրել է, եւ ավելի շատ դրանք ուղղել սեփական կարիքները բավարարելուն, իրենց հարստությունը ավելացնելուն, ովքեր ոչինչ չունեին, այդ հարստությունը ստեղծելուն: Հիմա իրենք վարկի գումարները հավաքագրելու լուրջ խնդիր ունեն, էլ ումի՞ց պետք է այդ գումարները հավաքեն, եթե ոչ պարզ, հասարակ, իրենց ձեւակերպմամբ՝ «հերոս» հարկատուից: Այսօր իշխանություններն ամենայն մանրամասնությամբ մտնում են «հերոս» հարկատուի ոչ միայն արտաքին նկատելի գրպանները, այլեւ ծոցագրպանները, որովհետեւ ուրիշ տարբերակ չունեն: Հիմա բոլոր գրպանները մտնելով՝ կոպեկ-կոպեկ պետք է հավաքեն, որպեսզի այդ հարկերը մարեն»:
Արմենուհի Կյուրեղյանը հավելում է. «Ժամանակին ժողովուրդը լուրջ չէր վերաբերվում ընդդիմության ներկայացուցիչների մտահոգություններին, որ մի շարք օրենքների կիրառումը եւ «բարեփոխումները» լուրջ խնդիրների առաջ է կանգնեցնելու մարդկանց: Ու արդեն իսկ կանգնել ենք այդ խնդիրների առաջ: Այսօր մանր ու միջին բիզնեսին շնչելու տարբերակ չեն թողել… Լայն թափով սկսել են հայտարարագրման գործընթացը, որը նույնպես ծանր հետեւանքներ է ունենալու: ԱԺ-ում հարց ու պատասխանի ժամանակ Նիկոլ Փաշինյանը հայտարարում էր ՝ ինչո՞ւ եք պետության դեմ քայլում, ինքներդ ձեր դեմ եք խոսում, դա պետության գրպանը չի, ձեր գրպանն է…Նոր հիշեցի՞ք, որ պետությունը մեր քաղաքացին է, օրենքները մշակելիս չէիք հիշո՞ւմ, որ քաղաքացու հետ գործ ունեք…»:
Գոհար ՀԱԿՈԲՅԱՆ
