«Նիստը շուրջ 20 րոպե ուշացումով ենք սկսել թարգմանչի չներկայանալու պատճառով»,-Հակակոռուպցիոն դատարանում ՀՀ երկրորդ նախագահ Ռոբերտ Քոչարյանի, ՀՀ Զինված ուժերի գլխավոր շտաբի նախկին պետ Յուրի Խաչատուրովի, ՀՀ պաշտպանության նախկին նախարար Սեյրան Օհանյանի եւ ՀՀ նախկին փոխվարչապետ Արմեն Գեւորգյանի գործով դատական նիստի մեկնարկին տեղեկացրեց նախագահող դատավոր Սարգիս Պետրոսյանը։
Այնուհետև ՀՀ երկրորդ նախագահի շահերի ներկայացուցիչ փաստաբան Արամ Վարդևանյանը նշեց, որ իրենց համար ընդունելի չէ, երբ Ռոբերտ Քոչարյանին ներկայացնում են մեղադրյալի դատավարական կարգավիճակով․ «Ի՞նչն է այդ սկզբունքային հարցի պատճառը, երբ մեղադրանք չկա, բայց օգտագործվում է մեղադրյալ եզրույթը։ Ուզում եմ հասկանալ՝ ինչի՞ համար է մշտապես նշված ձևակերպումն օգտագործվում։ Սա մեզ համար անհասկանալի և, մեղմ ասած, ոչ ընդունելի է»։
Դատավորն արձագանքեց՝ առնվազն երկու անգամ այդ առարկությունը չի ընդունվել դատարանի կողմից․ «Դատարանը չի ընդունել ու չի ընդունելու այդ առարկությունը։ Ռոբերտ Քոչարյանն ունի մեղադրյալի դատավարական կարգավիճակ, որը վերացված չէ»։
Կարդացեք նաև
Ռոբերտ Քոչարյանը նստած տեղից հարցրեց՝ ո՞ր հոդվածով։ Նախագահող դատավորը նրան նկատողություն արեց՝ տեղից չեն խոսում ու ասաց․ «Եթե ուզում եք հերթական անգամ լսել․․․»։ Ռոբերտ Քոչարյանը պատասխանեց՝ «Այո, ուզում եմ հերթական անգամ լսել»։ Դատավորն այս արտահայտությունից հետո հայտարարեց․ «Մեղադրյալ Քոչարյան, դատարանը Ձեզ նկատողություն է հայտարարում տեղից արձագանքելու համար»։ Ռոբերտ Քոչարյանն ի պատասխան ասաց՝ շատ բարի։
Այնուհետև միջամտեց Քոչարյանի մյուս պաշտպան Արամ Օրբելյանը․ «Առարկությունների՝ Ձեր չընդունելն ունի իրավական հետևանքներ հաջորդ ատյաններում կամ այլ դատավարական գործընթացների շրջանակներում»։ Դատավորը հարցրեց՝ ունի հետևանքնե՞ր, թե կարող է ունենալ հետևանքներ։ Արամ Օրբելյանը պատասխանեց․ «Ունի հետևանքներ։ Քննարկման ժամանակ միշտ կարող են բերվել փաստարկներ, միշտ կարող ենք ասել, որ բարձրացված է առարկություն այս հարցի վերաբերյալ։ Հետևանք այս իմաստով, այլ բան մի մտածեք։ Դատական նիստի ժամանակ ցանկացած բան ես նկատի ունեմ իրավաբանական փաստերի ներքո»։
Դատավորն ասաց՝ ձեր առարկությունն արձանագրվեց, բայց չի ընդունվում։
Տաթև ՀԱՐՈՒԹՅՈՒՆՅԱՆ
