ԱԺ «Պատիվ ունեմ» խմբակցությունը չի քննարկել հարցը՝ կո՞ղմ, թե՞ դեմ են քվեարկելու ԵՄ անդամակցության գործընթաց սկսելու նախագծին։ Այս մասին ԱԺ ճեպազրույցների ժամանակ ասաց «Պատիվ ունեմ» խմբակցության ղեկավար Հայկ Մամիջանյանը։ «Ֆրակցիայում այդ հարցը դեռեւս չի քննարկվել, երբ որ այդ հարցը փաստացի գա, հասնի լիագումարի նիստ, ֆրակցիան իր դիրքորոշումը կհայտնի։ Բայց ես ակնկալում եմ, որ դրա նախաձեռնող քաղաքական միավորները անկեղծ կլինեն ժողովրդի հետ եւ կասեն, որ փաստացի ԵՄ-ից որեւէ դրական արձագանք չի եղել։ Մեզ որեւէ մեկը դեռ ԵՄ չի հրավիրել, կընդունեն, որ իրենք զբաղվում են հույսի վաճառքով, կընդունեն, որ իրենք փորձում են մոլորեցնել մեր հասարակությանը»,- ասաց Մամիջանյանը։
Նա նշեց, որ նախորդ իշխանության օրոք Եվրամիության հետ եւ այն ժամանակ դեռեւս Մաքսային միության հետ վարվող բանակցություններն ընթացել են զուգընթաց, բանակցային գործընթացից երկու կողմերն էլ տեղեկացված են եղել։
«Մեր եվրոպացի գործընկերներն ի սկզբանե մեզ տեղեկացրել էին, որ որեւէ «կամ-կամ», որեւէ ընտրության պայման չկա։ Ինչ-որ պահից սկսած մեր եվրոպացի գործընկերները փոխեցին խաղի կանոնը եւ ասացին՝ «եւ-եւ» գործընթացները հնարավոր չեն, անհրաժեշտ է «կամ-կամ»։ Հենց այդ ժամանակվանից սկսած՝ ՀՀ-ն բոլոր հնարավոր ամենաբարձր խողովակներով տեղեկացրեց մեր եվրոպացի գործընկերներին, որ մենք ունենք ստրատեգիական համագործակցություն, ունենք տնտեսական շահեր եւ հետաքրքրված ենք Մաքսային միությանն անդամակցությամբ։ Ավելին ասեմ՝ մենք այն ժամանակ առաջարկեցինք նաեւ ստորագրել փաստաթուղթ, որը կպարունակի բացառապես քաղաքական բաղադրիչ, ինչին մեր եվրոպացի գործընկերները պատասխանեցին, որ դա հնարավոր չէ, չնայած դրանից կարճ ժամանակ անց այդ փաստաթուղթը ստորագրվեց Ուկրաինայի հետ»,- ասաց նա։
Հայկ Մամիջանյանը նշեց, որ «մեկ գիշերվա մեջ» որոշում չի եղել Սերժ Սարգսյանի կողմից, այդ իրադարձությունից հետո ՀՀ ու ԵՄ հարաբերությունները չեն վատթարացել։
Կարդացեք նաև
Ռոզա ՀՈՎՀԱՆՆԻՍՅԱՆ
