«Ազատություն» ռադիոկայան. Ադրբեջանի նախագահ Իլհամ Ալիևը ԱՄՆ նախկին նախագահ Ջո Բայդենի վարչակազմին անվանել է կողմնակալ և պնդել, որ դեմոկրատների քաղաքականությունը հանգեցրել է ադրբեջանա-ամերիկյան հարաբերությունների ճգնաժամի։ Այս մասին Ադրբեջանի առաջնորդը հայտարարել է ԱՄՆ քրիստոնյա առաջնորդների կոնգրեսի ղեկավար Ջոնի Մուրի հետ Դավոսում կայացած հանդիպմանը։
«Բայդենի և Բլինքենի վարչակազմի օրոք Միացյալ Նահանգները կողմնակալություն է դրսևորել Ադրբեջանի նկատմամբ, ինչի հետևանքով ճգնաժամ է առաջացել երկկողմ հարաբերություններում», – ասված է Ադրբեջանի նախագահականի հաղորդագրությունում։
Ալիևը քննադատել է նաև «Ազատության աջակցության ակտի» 907-րդ հոդվածի վերակիրարկումը, որը սահմանափակում է Բաքվին տրամադրվող ԱՄՆ կառավարության օգնությունը։ ԱՄՆ նախորդ կառավարության այս որոշումը Ադրբեջանի նախագահը գնահատել է «երախտամոռության դրսեւորում»։
