«Հունվարի 22-ը մաեստրո Երվանդ Քոչարի հիշատակի օրն է: Թանգարանը յուրաքանչյուր տարի փորձում է իրականացնել մի յուրահատուկ միջոցառում՝ փաստելով, որ շարունակվում է մեծ արվեստագետի հանրահռչակման գործընթացը եւ մենք նորանոր ծրագրեր , իրադարձություններ, միջոցառումներ ենք նախապատրաստում»,-ասաց Երվանդ Քոչարի տուն-թանգարանի տնօրեն Կարինե Քոչարը: Ինչ վերաբերվում է արվեստագետի՝ անցյալ տարի մեծ շուքով նշված ծննդյան 125-ամյակին, հավելեց, որ իր կարծիքով հոբելյանական միջոցառումները դեռ կշարունակվեն մինչեւ Քոչարի ծննդյան օրը՝ հունիսի 22-ը, հատկապես որ այս ընթացքում մի շարք հետաքրքիր միջոցառումներ են սպասվում:
Թանգարանի տնօրենը Քոչարի ծննդյան 125-ամյակի շրջանակում թանգարանի եւ հոբելյանական միջոցառումների հանրահռչակման գործին աջակցելու համար շնորհակալագիր հանձնեց «Առավոտի» թղթակից Գոհար Հակոբյանին, այլ լրագրողների եւ գործընկերների։ «Ֆոտոլուր» լրատվական գործակալության տնօրեն Մելիք Բաղդասարյանը նշեց, որ առաջին անգամ Քոչարի տուն, որը հետագայում թանգարան է դարձել, եկել է իր հոր հետ, տեսել է, թե ինչպես էր վարպետը աշխատում. «Մտքովս երբեք չի անցել, որ մի օր էլ կարող է մտնեմ ու շնորհակալագիր ստանամ»:
Կարինե Քոչարը հիշեցրեց Փարիզի «Պոմպիդու» կենտրոնում կայացած Քոչարի մեծարման երեկոյի եւ արվեստագետի գործերի՝ Պոմպիդուի մշտական ցուցադրությունում ընդգրկվելու մասին: Հավելեց, որ այս տարվա փետրվարի 15-ին փարիզյան նշանավոր ցուցասրահներից մեկում կբացվի Քոչարի տարածանկարներին նվիրված եւս մեկ ցուցադրություն։ Ի թիվս այլնի, անդրադարձ եղավ նաեւ Երեւանի Պուշկին 62 հասցեում գտնվող շենքի ճակատային մասում մուրալ եղանակով Քոչարի «Ընդվզում» գործի վերարտադրությանը, «Քոչար ֆեստին», Հայաստանի ազգային պատկերասրահում բացված ծավալուն ցուցադրությանը:
Ասաց նաեւ, որ ՀՀ կենտրոնական բանկը թողարկել է արծաթյա եզակի հուշադրամ, իսկ Հայփոստի կողմից մարվել եւ շրջանառության մեջ է դրվել նամականիշով գեղաթերթիկ:
Կարդացեք նաև
Գոհար ՀԱԿՈԲՅԱՆ
