Հայաստանի պետական կառավարման և հասարակական կյանքի մեջ «ազգային» բառի հետևողական հեռացման վերջին փորձերը լրջագույն մտահոգություն են առաջացնում:
Այս քայլերն իրենց էությամբ ուղղված են ոչ միայն բառի կիրառման դադարեցմանը, այլև՝ ազգային ինքնության և պատմական հիշողության համակարգված ջնջմանը:
«Ազգային» բառի արհամարհումը նշանակում է քայլ առ քայլ դուրս մղել այն արժեքները, որոնք ձևավորել են հայ ժողովրդի ինքնությունը հազարամյակների ընթացքում: Այն, ինչ ներկայացվում է որպես «ժամանակակից» կամ «միջազգային ստանդարտների» պահանջ, իրականում ծառայում է ազգային գաղափարների զրոյացման և հասարակության արմատներից օտարման նպատակներին:
Արդյո՞ք հայ հասարակությունը պատրաստ է ընդունել այդպիսի փոփոխություն՝ առանց գիտակցելու դրա քաղաքական, մշակութային և հոգեբանական հետևանքները: Այսօր, երբ մեր տարածաշրջանը կանգնած է բարդագույն մարտահրավերների առաջ, այդպիսի քայլերն ավելի շատ կթուլացնեն հասարակության միասնականությունն ու դիմադրողականությունը:
Կարդացեք նաև
Հարց է առաջանում՝ ո՞ւմ է ձեռնտու այս ծրագիրը: Ինչո՞ւ է հայկական ինքնության հիմնական հենասյուներից մեկը դառնում անտեսման և ժխտման թիրախ: Այս մոտեցումները ոչ թե արդիականացման նշան են, այլ մշակութային, քաղաքական և ազգային անվտանգության լրջագույն սպառնալիք:
Կոչ ենք անում Հայաստանի իշխանություններին և քաղաքական պատասխանատուներին վերանայել այս մոտեցումը:
Հանրության մեջ ազգային արժեքների նկատմամբ հարգանքի նվազումը կարող է անդառնալի վնաս հասցնել թե՛ հասարակությանը, թե՛ Հայոց պետության հիմքերին:
Հայ ժողովրդի պայքարը ինքնության պահպանման համար երբեք դադար չի առել: Այսօր էլ մենք իրավունք չունենք զիջելու այն արժեքները, որոնք մեզ դարձրել են պետություն և ազգ:
«Ազգային» հասարակական կազմակերպությունը կտրականապես մերժում է պետական և ազգային նշանակության օբյեկտներից «ազգային» բառի հեռացման ցանկացած փորձ: Սա ոչ թե «բարեփոխում» է, այլ՝ հայ ժողովրդի ազգային դիմագծի նկատմամբ իրականացվող մշակութային ցեղասպանության ձևերից մեկը: Այս մոտեցումները չեն ծառայում հասարակության բարգավաճմանը, այլ ծառայում են արտաքին շահերի, որոնք նպատակ ունեն վերացնել հայ ժողովրդի ազգային դիմագիծը:
Կոչ ենք անում իշխանություններին դադարեցնել այս հակազգային քաղաքականությունը և վերականգնել ազգային արժեքների և ինքնության գերակայությունը պետական և հասարակական կյանքում:
Հայ ժողովուրդն իր պատմության ընթացքում բազմիցս ապացուցել է, որ ի վիճակի է պաշտպանել իր ազգային ինքնությունը: Այսօր ևս մենք պարտավոր ենք միասնականորեն դիմակայել մեր ինքնությունը վտանգող այս ծրագրերին:
Մենք պատասխանատվություն ենք կրում մեր սերունդների առջև՝ պահպանելու այն արժեքները, որոնք դարերի ընթացքում մեզ դարձրել են ազգ և պետություն:
«Ազգային» պատմամշակութային հասարակական կազմակերպություն
