ՀՀ ԱԺ-ում կառավարության հետ հարցուպատասխանի ժամանակ ՀՀ ԱԺ «Հայաստան» խմբակցության պատգամավոր Մհեր Մելքոնյանը մտահոգություն հայտնեց, որ Անի խոշորացված համայնքի Գուսանագյուղ և Լուսաղբյուր բնակավայրերի դպրոցները փակվելու և միանալու են Շիրակավան համայնքի դպրոցին։
Պատգամավորը ԿԳՄՍ նախարար Ժաննա Անդրեասյանին հարցրեց՝ ի՞նչ չափանիշներով են ընտրվել օպտիմալացման ենթակա դպրոցները։ Ժաննա Անդրեասյանը պատասխանեց․ «Կրթական որակյալ ծառայությունների հասանելիության ծրագիրն առաջին հերթին նոր դպրոցների և կրթահամալիրների կառուցման մասին է։ Որևէ դպրոցի փակման գործընթաց չենք իրականացնում, իրականացնում ենք նոր դպրոցների շինարարություն։ Նպատակն է, որ դպրոցը ոչ միայն լինի անունով, այլև կրթության որակը լինի այնպիսին, որ վստահ լինենք՝ մեր երեխաները ստանում են լավագույն կրթություն։ Այս տրամաբանությամբ կազմվել է կրթահամալիրների ցանկը»։
Ընդդիմադիր պատգամավորն այս առիթով ահազանգեց՝ եթե այդ գյուղերի դպրոցները փակվեն, այդտեղից հարյուր տոկոս արտագաղթ է լինելու, նախարարն արձագանքեց․ «Այս պահին գյուղերից արտագաղթը տեղի է ունենում հենց այն պատճառով, որ մարդիկ գերադասում են տեղափոխվել բնակավայրեր, որտեղ կրթության որակը լավն է»։
Տաթև ՀԱՐՈՒԹՅՈՒՆՅԱՆ
