«Ոչ միայն այսօրվա քննարկումն է ցույց տալիս, որ բավարար չափով չեք նախապատրաստվել համակարգի ներդրմանը, այլև, որ տարեսկզբից երկու շաբաթ չէր աշխատում համակարգը։ Երկու տարվա մեջ էդ տեխնիկական խնդիրները լուծել չէիք կարողանո՞ւմ»,- ՀՀ ԱԺ-ում կառավարության հետ հարցուպատասխանի ժամանակ դիմելով ՀՀ վարչապետ Նիկոլ Փաշինյանին, ասաց ՀՀ ԱԺ «Հայաստան» խմբակցության պատգամավոր Թադևոս Ավետիսյանը՝ անդրադառնալով հայտարարագրման համակարգին։
Նա հայտարարեց՝ կառավարությունն իր քննարկումների ընթացքում առնվազն ճիշտ չէր ասում, որ հարկային նոր բեռ չի ավելանում քաղաքացու համար․ «Ձեր հնչեցրած նպատակները լավն են, հանրահայտ ճշմարտություններ, բայց էս գործիքը դրա հետ կապ չունի։ Այնպես եք ներկայացնում, որ կարծես էս գործիքով է պետությունը եկամուտների մասին տեղեկություն ունենում։ Էդ համակարգը կա։ Հիմա էդ համակարգից վերցնում եք, աշխատավարձը դնում սրա վրա, և դուք ասում՝ հարցերը լուծված են։ Դուք իրականում պատկերացնում եք, որ այս հայտարարագրով կլուծեք թափանցիկության հա՞րցը։ Ստվերում գտնվողը, որը գիտակցված գտնվում է ստվերում, հիմա էս թուղթը լրացնելով ստվերից դո՞ւրս է գալու»։
Այնուհետև ցույց տալով իր ձեռքին մի թուղթ՝ պատգամավորն ասաց․ «Սա իմ հայտարարագիրն է, տպել, բերել եմ։ Լրացրել եմ մի կերպ ամսի 18-19-ին, քանի որ ամսի 1-2-ին համակարգը չէր աշխատում։ Դա ունի երրորդ բաժին՝ հարկային գործակալ չհանդիսացողներից եկամուտների եկամտային հարկի հաշվարկ։ Կա գույքի օտարման դիմաց եկամուտ կետ։ Նախորդ տարի, երբ իմ ավտոմեքենան վաճառեցի, այստեղ գրել եմ այդ մասին տեղեկատվություն։ Ավտոմատ հաշվարկել է հարկ՝ դրա տասը տոկոսի դիմաց։ ՀՀ հարկային օրենսդրությամբ ավտոմեքենաների վաճառքից 10 տոկոս եկամտահարկ չի կարող առաջանալ»։
Կարդացեք նաև
Ի պատասխան այս խնդիրների՝ ՀՀ վարչապետ Նիկոլ Փաշինյանը հիշեց փախուստ Շոուշենկից ֆիլմը։
Մանրամասները՝ տեսանյութում
Տաթև ՀԱՐՈՒԹՅՈՒՆՅԱՆ
