ՀՀ ԱԺ-ում կառավարության անդամների հետ հարցուպատասխանի ժամանակ «Հայաստան» խմբակցության պատգամավոր Գառնիկ Դանիելյանը ՀՀ փոխվարչապետ Մհեր Գրիգորյանից հետաքրքրվեց՝ օրերս տեղի ունեցած սահմանազատման և սահմանագծման հանձնաժողովի նիստի ժամանակ պայմանավորվածությո՞ւն է ձեռք բերվել, որ սահմանազատման և սահմանագծման գործընթացը պետք է սկսվի Տավուշի մարզից և արդյոք ՀՀ-Վրաստան միջպետական ճանապարհը Ոսկեպար-Կիրանց հատվածում հանձնվելու է Ադրբեջանին:
Մհեր Գրիգորյանը պատասխանեց․ «Մենք մեր աշխատանքների արդյունքում ձեռք բերված պայմանավորվածությունները պարտադիր հրապարակում ենք։ Այդ շրջանակի համաձայն՝ մեր աշխատակարգի շրջանակից դուրս չենք գալիս։ Մենք ունենք հաստատված կանոնակարգը, որը հստակ նկարագրում է, թե ինչպես են որոշումները կայացվում և մտնում ուժի մեջ։ Այս շրջանակներում Դուք կարող եք գտնել Ձեր հարցի պատասխանը»։
Գառնիկ Դանիելյանն արձագանքեց՝ միգուցե դահլիճից հարցնենք՝ որևէ մեկը Ձեր ասածից բան հասկացա՞վ․ «Նորից եմ կրկնում հարցս՝ Կիրանց-Ոսկեպար հատվածում ՀՀ-Վրաստան ճանապարհը անցնելո՞ւ է Ադրբեջանի վերահսկողության տակ»։
Մհեր Գրիգորյանը կրկնեց․ «Պայմանավորվածությունների շրջանակները հրապարակված են։ Եթե Ձեր ասածն այդ պայմանավորվածության մեջ չկա, ուրեմն չկա նման պայմանավորվածություն»։
Կարդացեք նաև
Տաթև ՀԱՐՈՒԹՅՈՒՆՅԱՆ
