«Այո, տունս թալանել են, տարել են գումար, մի քանի ոսկյա շղթա, ժամացույց։ Ընդհանուր վնասի չափը հաշվեցինք, մոտ 7-8 մլն դրամի կարգի է»,- Ազգային ժողովում լրագրողների հետ ճեպազրույցում ասաց ՔՊ խմբակցության պատգամավոր Հրաչյա Հակոբյանը։
Հարցին, թե որքա՞ն կանխիկ գումար ուներ տանը, Հրաչյա Հակոբյանը պատասխանեց․«Քեշը 3 մլն դրամի կարգի էր»։ Հարցին, թե ինչո՞ւ չի հետեւում Նիկոլ Փաշինյանի հորդորներին եւ ինչո՞ւ է կանխիկ գումար պահում, նա պատասխանեց․ «Բանկային համակարգում էլ ունեմ գումար, պարզապես երբեմն կարիքներ է լինում, ինչպես շատերը, երբեմն կանխիկ եմ ծախսում»։
Հրաչյա Հակոբյանն ասաց, որ ինքը ոստիկանություն է դիմել 2025-ի հունվարի 14-ին, իսկ դեպքը տեղի է ունեցել 2024-ի դեկտեմբերի 29-ին։ «Ես գնացել էի Միացյալ Նահանգներ, իմ երեխաները բնակվում են ԱՄՆ-ում։ Մենք ամուսնալուծված ենք նախկին կնոջս հետ, նախկին կինս ամուսնացել է Ամերիկայում բնակվող քաղաքացու հետ, եւ ես նախընտրել եմ, որ երեխաներս մեծանան իրենց մոր հետ»,- մանրամասնեց նա։
Հրաչյա Հակոբյանն ասաց, որ ամեն տարի տոներին մեկնում է ԱՄՆ, հավանաբար գողերն իմացել են այդ մասին։
Կարդացեք նաև
Նա նշեց, որ ինքնին երեւույթը մտահոգիչ է․ «Չեմ կարող ասել՝ ինչի արդյունք է, բայց այնպես չէ, որ նախկինում գողություններ չեն եղել»։
Մանրամասները՝ տեսանյութում
Ռոզա ՀՈՎՀԱՆՆԻՍՅԱՆ
