«Հայաստան» խմբակցության պատգամավոր Թադեւոս Ավետիսյանն ԱԺ հայտարարությունների ժամին իր ելույթում անդրադարձավ համընդհանուր հայտարարագրման համակարգի խնդիրներին։
«Նախորդ տարի հայտարարագրման ենթակա շուրջ 60 հազար քաղաքացիների նույնիսկ կեսը չի ներկայացրել հայտարարագիր, որի մասին նորից լուռ են պատասխանատուները։ Բա որ այդքան լավ բան է դա, ինչո՞ւ մարդիկ չեն անում»,- հարցադրում արեց Ավետիսյանը։
Նրա խոսքով՝ այս տարի էլ հայտարարագիր պետք է ներկայացնեն շուրջ 800 հազար վարձու աշխատողներ ու քաղիրավական պայմանագրերով եկամուտ ստացողները, իսկ հաջորդ տարվանից արդեն ՀՀ բոլոր քաղաքացիները։ «Ի դեպ, այս տարվա սկզբին արդեն պարզ դարձավ, որ ՊԵԿ-ի տեղեկատվական համակարգը պատրաստ չէր ընդունելու այդ հայտարարագրերը։ Եկամուտների տարեկան հայտարարագրումը թափանցիկության ապահովման եւ ստվերի կրճատման տեսանկյունից էական ազդեցություն չի կարող ունենալ, եթե զուգահեռաբար չի գործում ծախսերի ամբողջական հաշվարկման համակարգը։ Եթե հայտարարագրման ենթակա քաղաքացին ունի ստվերային եկամուտ, որն արտացոլված չէ եկամտահարկի միասնական անձնավորված համակարգում, ապա նա այդ եկամուտը չի ներառելու նաեւ իր հայտարարագրում։ Անօրինական եկամուտների հայտարարագրումն այսպես թե այնպես շարունակելու է մնալ հարկային մարմինների վերահսկողության ներքո, որի արդյունավետության խնդիրները գնալով աճում են։ Սրանով ըստ էության հավաքագրվում է նույն տեղեկատվություն, որն արդեն իսկ առկա է հարկային մարմնի՝ եկամտահարկի անձնավորված համակարգում»,- ասաց նա։
Թադեւոս Ավետիսյանն ասաց, որ նման ձեւով ներդրվող եկամուտների հայտարարագրման համակարգը ժամանավրեպ է, դրված նպատակի տեսանկյունից ոչ լիարժեք ու ոչ համարժեք, իսկ քաղաքացիների համար դառնալու է ավելորդ վարչարարության ու տուգանքի հիմք։
Կարդացեք նաև
Մանրամասները՝ տեսանյութում
Ռոզա ՀՈՎՀԱՆՆԻՍՅԱՆ
