«Սովորական խոսակցություն էր ելույթներից հետո»,- այսպես այսօր ԱԺ նիստերի դահլիճում գոռգոռոցների ու լարված մթնոլորտի վերաբերյալ լրագրողների հարցերին պատասխանեց «Հայաստան» խմբակցության պատգամավոր Գառնիկ Դանիելյանը:
Այդ լարված խոսակցությունը եղել է Դանիելյանի եւ ՔՊ-ական պատգամավոր Վահագն Ալեքսանյանի հետ:
Ինչ թեմայի շուրջ էր խոսակցությունը՝ հարցին, պարոն Դանիելյանը պատասխանեց՝ բանակի:
«Ես հարց եմ տվել եւ փոխնախարարը եւ կարծում եմ բոլոր այն մարդիկ, որոնք բանակի հետ որեւէ առնչություն ունեն, գիտեն՝ ինչ խնդիր կա՝ համազգեստի, «բատինկաների» եւ ուրիշ էլի խնդիրներ եմ բարձրացրել: Այդ խնդիրները կան: Ես ելույթիս մեջ ասել եմ, որ պատգամավորներ կան, որոնք նախկինում բողոքում էին, որ զրկված են եղել, ասում եմ՝ հիմա էլ կան այդ խնդիրները, ոչ թե ուզեցել եմ ստվեր գցել, այլ այդ խնդիրների լուծմանը միտված ռեալ աշխատանքներ տարվեն» ,- պատմեց Դանիելյանը:
Կարդացեք նաև
Պատգամավորն ասաց, որ այս թեմայով էլ իշխանական ներկայացուցիչները նախկինների անունն են տվել, բայց ինքը կարծում է, որ այս իշխանությունները իրավունք չունեն անընդհատ 28 տարվա իշխանության եղած մարդկանց մեղադրելով՝ խնդիրները չլուծել. «Եթե դու արդեն 7 տարի եւ ավել իշխանության ես ու անընդհատ մեղադրում ես, լավ, նախկինում ոչ ցանկալի, արգահատելի բաներ եղել են, ես էլ այդ երեւույթների դեմ պայքարել եմ, բայց ինչքա՞ն մեղադրես նախկիններին»:
Պատգամավորն անդրադարձավ նաեւ ՔՊ-ի ԲԴԽ թեկնածու Ալեքսանդր Սիրունյանին, նկատեց, որ բերում են մի մարդու, որը հայհոյախառն խոսույթով է հայտնի, սոցցանցերում ներազգային պառակտում էր մտցնում. «Բերում եք մի մարդու, որն ունի նման խոսույթ, պահվածք ու գործելաոճ, մնացածին ո՞նց եք մեղադրում… Այս մարդիկ չափ ու սահման չունեն: Իմ վրդովմունքը հենց դրա մասին էր»:
Արփինե ՍԻՄՈՆՅԱՆ
