««Սննդամթերքի անվտանգության մասին» օրենքում լրացումներն ու փոփոխությունները միտված են պաշտպանելու մարդու առողջությունը, ինչպես նաեւ կանխելու սպառողներին մոլորության մեջ գցող գործողությունները. այս մասին ասել է ՀՀ էկոնոմիկայի նախարարի տեղակալ Տաթեւիկ Սարգսյանը:
Զեկուցողի տեղեկացմամբ մեր երկրում սննդի շղթայի օպերատորները (բացառությամբ գյուղատնտեսական մթերքի ու գյուղատնտեսական կենդանիների վաճառքով եւ շրջիկ առեւտրով զբաղվողների, անասնաբուժության բնագավառում օգտագործվող կենսապատվաստուկներ արտադրողների) գրանցման համար սննդի շղթայի օպերատորների գրանցման եւ ռեեստր վարող մարմին այսուհետ օրենքով սահմանված տեղեկատվության հետ ներկայացնելու են նաեւ ներդրված Վտանգի վերլուծության հսկման կրիտիկական կետերի (ՎՎՀԿԿ) համակարգի սկզբունքների վրա հիմնված ընթացակարգերի վերաբերյալ տեղեկատվություն եւ հաստատված պլանը, ինչն ապացույց է, որ ընկերությունը պատասխանատու է սննդամթերքի անվտանգության համար եւ իր ձեռնարկությունում կիրառում է անվտանգության ու որակի կառավարման առաջադեմ գործիքներ, ինչը կնպաստի ձեռնարկությանը շուկաների դիվերսիֆիկացման հարցում:
Վերոնշյալ դրույթն ուժի մեջ կմտնի 2027 թվականի հունվարի 1-ից:
«Միաժամանակ անհրաժեշտ է օրենքի 9-րդ հոդվածում կատարել լրացում, այն է` տեղական արտադրության սպանդանոցային ծագման հումքի եւ մթերքի ստացման ժամանակ սահմանել կարգավորում նաեւ կենդանու բուծման երկրի մասին, քանի որ ներկայումս առկա է օրենսդրական բաց, ինչն էլ հնարավորություն չի տալիս սպառողներին տարբերակել` կենդանին ո՞ր երկրում է բուծվել, տեղակա՞ն արտադրությամբ, թե` ներմուծված կենդանուց է ստացվել»,- ընդգծել է փոխնախարարը եւ հավելել, որ օրենքի ընդունումից հետո անհրաժեշտ փոփոխություններ կկատարվեն նաեւ որոշ իրավական ակտերում, որոնցով կարագավորվում են սպանդից գոյացած կենդանական ծագման հումքի եւ մթերքի հետ կապված հարաբերությունները:
Կարդացեք նաև
Հարակից զեկուցող, պատգամավոր Սերգեյ Բագրատյանը բարձրաձայնել է Տնտեսական հարցերի մշտական հանձնաժողովի դրական եզրակացությունը: Կարեւորելով նախաձեռնությունը` պատգամավորը հորդորել է կողմ քվեարկել:
Նախաձեռնությունն առաջին ընթերցմամբ քննարկվել է հունվարի 21-ի` ԱԺ նիստում:
ԱԺ
