Հակակոռուպցիոն վերաքննիչ քրեական դատարանը, որն անցած տարվա դեկտեմբերի 11-ին երկու ամսով երկարացրել էր Գյումրու նախկին քաղաքապետ Սամվել Բալասանյանի կրտսեր որդու՝ Խաչատուր Բալասանյանի կալանքի ժամկետը, երեկ փոխել է նրա խափանման միջոցը․ 80 միլիոն դրամ գրավի կիրառմամբ նորից տնային կալանքի ենթարկելով։
Aravot.am-ի այս տեղեկությունը հաստատել են « Բալասանյան դաշինքից»։
Հիշեցնենք՝ Խաչատուր Բալասանյանը, որն անցնում է իրենց ընտանիքին պատկանող «Սև Բերդ» պատմամշակութային ամրոցի պետական սեփականություն հանդիսացող, օտարման չենթակա հարակից հողատարածքները հանցավոր ճանապարհով սեփականաշնորհելու քրեական վարույթով, ի սկզբանե 70 միլիոն դրամ գրավի կիրառմամբ տնային կալանքի էր ենթարկվել, սակայն անցած տարվա նոյեմբերի 15-ին դատարանն անսպասելիորեն փոխել էր նրա խափանման միջոցը՝ պատիժը կրելու համար ուղարկելով Արմավիր քրեակատարողական հիմնարկ։
Նրան պահում էին խիստ ռեժիմի ներքո՝ բացի կնոջից, ընտանիքի մյուս անդամներին արգելելով տեսակցել։
Կարդացեք նաև
Հիշեցնենք, որ այս գործով մեղադրյալների թիվը 5-ն է, այդ թվում Գյումրու նախկին քաղաքապետ Սամվել Բալասանյանը, որն այս պահին գտնվում է ԱՄՆ-ում։
Տնային կալանքի մեջ է գտնվում նաև Գյումրու փոխքաղաքապետ Սուրեն Ջանոյանը, այս գործով անցնում է նաև Գյումրու նախկին փոխքաղաքապետ Ռուբեն Սանոյանը՝ Սամվել Բալասանյանի քրոջ ամուսինը, որն ազատ է արձակվել երկրից չհեռանալու պայմանով վերցված ստորագրությամբ և Սիրեկան Մկոյանը։
Քրեական այս գործը պատճառ դարձավ Գյումրիում իշխանափոխության․ ճնշումների ներքո քաղաքը կառավարող «Բալասանյան դաշինքը» հրաժարական ներկայացրեց, որից հետո «Քաղաքացիական պայմանագիր» կուսակցությունն անցկացրեց «փրայմերիզ»՝ ներկուսակցական նախնական ընտրություն՝ քաղաքապետի ժամանակավոր պաշտոնակատար նշանակելով Սարիկ Մինասյանին։
Մարտի 30-ին Գյումրիում նշանակված են ՏԻՄ ընտրություններ, Բալասանյանների հեռանալու արդյունքում ՔՊ-ին մրցակցության լուրջ հայտ են ներկայացրել Գյումրու նախկին քաղաքապետ Վարդան Ղուկասյանն ու Ազգային ժողովի պատգամավոր Մարտուն Գրիգորյանը։
Չի բացառվում, որ Սամվել Բալասանյանի որդուն կալանավայրից տուն են ուղարկել՝ հաշվի առնելով Գյումրիում թեժացող նախընտրական կրքերը․ վերջիվերջո հանրապետության երկրորդ քաղաքը 2012 թվականից կառավարող գործարար, մեծահարուստ Բալասանյաններն էլ մեծ շրջապատ ու կայացած թիմ ունեն, և եթե ցանկություն հայտնեն ընտրություններում թեկուզև ներքին ձևով խոչընդոտել «Քաղաքացիական պայմանագիր» կուսակցությանը, դա այնքան էլ դժվար չի լինի նրանց համար։
Նունե ԱՐԵՎՇԱՏՅԱՆ
