Կարեն Դեմիրճյանի անվան մարզահամերգային համալիրում կայացած Հայաստանում առաջին միջազգային հեղինակավոր՝ IBA «Չեմպիոնների գիշեր» պրոֆեսիոնալ բռնցքամարտի մրցաշարի շրջանակներում ռինգ մտան Հայաստանի վեց բռնցքամարտիկներ, որոնցից չորսը առավելության հասան մրցակիցների նկատմամբ:
Մեր բռնցքամարտիկների հաղթանակների սկիզբը դրեց 60 կգ քաշային Արթուր Բազեյանը, որը վեց ռաունդանոց մենամարտում վստահորեն պարտության մատնեց Ալբանիայի ներկայացուցիչ Արդիթ Մուրջային:
Թիմակցի գործը շարունակեց 71 կգ քաշային Գուրգեն Մադոյանը: Նա վեց ռաունդ շարունակված դիտարժան մենամարտում առավելության հասավ ուզբեկ Կուդրատիլլո Աբդուկախարովի նկատմամբ:
Կարդացեք նաև
Մարզասերներն առանձնակի հետաքրքրությամբ էին սպասում բարձր քաշային կարգերի մենամարտերին, որտեղ նախ Նարեկ Մանասյանը 92 կգ քաշային կարգում հաղթեց նիգերիացի Օսթին Նամդիին, իսկ գերծանր քաշային (+92 կգ), գյումրեցի Դավիթ Չալոյանը ութ ռաունդում ոչ մի շանս չտվեց Ռուսաստանի ներկայացուցիչ Վիտալի Խուդուկովին:
Աշոտ ՀԱԿՈԲՅԱՆ
