«Եվս մեկ անգամ համոզվեցի, որ այդ վկայի ցուցմունքները չեն կարող արժանահավատ լինել»,- այս մասին այսօր Aravot.am-ին ասաց Ազատ գյուղի զինվորական կացարանում զոհված 15 զինծառայողների գործով տուժողների ներկայացուցիչ Նորիկ Նորիկյանը:
Հիշեցնենք, որ այսօր ՀՀ Գեղարքունիքի մարզի առաջին ատյանի ընդհանուր իրավասության դատարանի Սևան քաղաքի նստավայրում ընթացող դատական նիստին հարցաքննվեց առանցքային վկա՝ դասակի հրամանատար Տիգրան Մանասերյանը: Նշենք նաեւ, որ մեղադրյալ Եղիշե Հակոբյանը եւ նրա պաշտպանը միջնորդեցին արգելել նիստերի տեսանկարահանումը, ինչը դատարանը բավարարեց:
«Հրապարակային դատավարությունը բխում էր հենց մեղադրյալ Եղիշե Հակոբյանի շահերից: Ինձ համար անհասկանալի է, թե ինչու նման դիրքորոշում արտահայտվեց Եղիշե Հակոբյանի կողմից: Բայց դեռեւս 2024 թվականի դեկտեմբերի 18-ին լինելով Վարդաշեն ՔԿՀ-ում՝ ինձ զանգահարել է Եղիշե Հակոբյանն ու որոշակի հանգամանքների մասին տեղեկություններ է հաղորդել այս քրեական վարույթի շրջանակներում: Մենք հետամուտ ենք լինելու այդ հանգամանքների ուսումնասիրման, դրանք հերքելուն կամ հաստատելուն ուղղված գործողություններ ենք իրականացնելու: Ինչ վերաբերում է վկա Մանասերյանին, եւս մեկ անգամ համոզվեցի, որ այդ վկայի ցուցմունքները չեն կարող արժանահավատ լինել»,- ասաց փաստաբանը:
Կարդացեք նաև
Արփինե ՍԻՄՈՆՅԱՆ
