«Ճիշտ է իրականացրել ենք բարեփոխումներ, ստվերի դեմ պայքար է մղվել, բայց կոշտի ու օբյեկտիվության ճիշտ բալանս ու հասարակության հետ մարդակենտրոն հաղորդակցման ճիշտ մեթոդները դեռ չենք կարողացել ամբողջությամբ գտնել, սա պետք է լինի կարեւոր առաջնահերթություն մեզ համար»,- այսօր 2024 թվականի ամփոփիչ ասուլիսում ասաց ՊԵԿ նախագահ Էդուարդ Հակոբյանը:
Ըստ նրա՝ պետական եկամուտների կոմիտեն իր ջանքերն ուղղելու է պատշաճ հարկահավաքում իրականացնելու ուղղությամբ, ինչը ենթադրում է նաև ստվերի դեմ պայքար:
Հայաստանում նախորդ տարի հավաքվել են 2 տրիլիոն 390.9 մլրդ դրամի հարկային եկամուտներ ու տուրքեր, ինչը 2023 թվականի համեմատ ավելի է 117 մլրդ դրամով:
Ըստ ՊԵԿ նախագահի. «Երբ 2024 թվականին բյուջեն ձևավորվում էր, կանխատեսումը 2 տրլն 614 մլրդ էր, բայց Ֆինանսների նախարարությունը շատ թափանցիկ ձևով նշել է նաև ռիսկերի մասին: Պարզ է, որ գործում ենք մի անորոշ միջավայրում, որտեղ սցենարները բազմաթիվ են: Հետևաբար, կախված տնտեսական սցենարից՝ տարբեր է լինում նաև հարկահավաքման մակարդակը: Տնտեսական աճը, գնաճը, փոխարժեքը, ներմուծումը, առանցքային մակրոտնտեսական ցուցանիշները ճշգրտվել են»:
Կարդացեք նաև
Հակոբյանի խոսքով, ներդրվել է նաեւ չգրանցված աշխատողների բացահայտման համակարգ, որը թույլ է տալիս տեղում նույնականացնել համապատասխան աշխատողներին:
Արփինե ՍԻՄՈՆՅԱՆ
