«Աշտարակի բաժնի պետի ազատումը որևէ կապ չունի թմրամիջոցի օգտագործման, իրացման առերևույթ տվյալ դրվագի հետ»,- ամփոփիչ ասուլիսի ժամանակ վստահեցրեց Ներքին գործերի նախարար Արփինե Սարգսյանը՝ անդրադառնալով այս թեմայով Գագիկ Շամշյանի հարցադրումներին։
Արփինե Սարգսյանը հավաստիացրեց՝ Աշտարակի բաժնի պետին աշխատանքից ազատումն ընդհանուր կադրային քաղաքականության տրամաբանության մեջ է, ինչի մասին նա տեղյակ եղել է․ «Մենք պլանավորել ենք կադրային փոփոխություններ, այդ թվում՝ Աշտարակի բաժնի մասով։ Կադրային փոփոխություն ցանկացած մակարդակով կարող է ցանկացած պահի լինել, այդ թվում՝ իմ։ Ոչ մեկն ապահովագրված չէ։ Առաջիկայում ևս կլինեն կադրային փոփոխություններ։ Աշտարակի բաժնի պետի հետ խոսակցությունը եղել է դեպքից մի քանի օր առաջ, երբ ընդհանուր կադրային քաղաքականության հարցերն են քննարկվել։ Ոչ միայն այս բաժնին է լինելու անդրադարձը, այլև բոլոր բաժիններին, բաժնի պետերին, աշխատակիցներին, քրեական, պարեկային և մնացյալ բոլոր ստորաբաժանումների աշխատակիցներին՝ ղեկավարներից մինչև ստորին օղակում գործող սովորական տեսուչների աշխատանք»։
Լրագրողների հորդորին՝ վերանայեք փրկարար ծառայողների աշխատավարձը, քանի որ նրանք իրենց կատարած աշխատանքի համեմատ չնչին գումար են ստանում, Արփինե Սարգսյանն այսպես արձագանքեց․ «Կան որոշակի աշխատանքներ, որոնք թերագնահատված են պետական կառավարման համակարգում։ Այս տրամաբանության մեջ ներդրել ենք փրկարար ծառայության ատեստավորման համակարգը։ Անցյալ տարվանից սկսած՝ փրկարարները կարող են ատեստավորվել։ Դեռ ատեստավորում անցածների մեծ թիվ չունենք․ շատերը չեն կարողանում հաղթահարել ատեստավորման բոլոր փուլերը։ Բայց ունենք փրկարար ծառայությունում վարչության պետ, որը ստանում է շուրջ մեկ միլիոն աշխատավարձ՝ հարկերը ներառյալ»։
Կարդացեք նաև
Տաթև ՀԱՐՈՒԹՅՈՒՆՅԱՆ
