Գյումրու քաղաքապետարանի աշխատակազմի քարտուղար Կարեն Բադալյանը, որը «Բալասանյան դաշինքի» հրաժարականից հետո քաղաքապետարանի միակ պաշտոնյան էր, որը որոշումներ կայացնելու ու որոշակի փաստաթղթեր ստորագրելու իրավասություն ուներ, հունվարի 9-ից լքել է իր 13 տարվա աշխատավայրը։
Մասնագիտությամբ տնտեսագետ Կարեն Բադալյանը տարբեր կառույցներում է աշխատել՝ թե՛ բանկում, թե՛ էլցանցում և՛ թե Ազգային Ժողովում։
Նա Ազգային ժողովի նախագահի տեղակալ Սամվել Բալասանյանի խորհրդականն էր․ Սամվել Բալասանյանի՝ Գյումրու քաղաքապետ ընտրվելուց հետո նրա հետ տեղափոխվեց Գյումրու քաղաքապետարան։
«13 տարի աշխատել եմ Գյումրու քաղաքապետարանում, հեռացել եմ իմ նախաձեռնությամբ՝ սեփական դիմումի համաձայն։ Ինձ առաջարկել են մնալ, շարունակել պաշտոնավարել, ես չեմ համաձայնել, գերադասում եմ հեռանալը։
Կարդացեք նաև
Ես կարող էի հեռանալ՝ Վարդգես Սամսոնյանին դիմում ներկայացնելով, բայց մնացի, որպեսզի չպարալիզիացնենք քաղաքապետարանի աշխատանքը, քաղաքը ճգնաժամի մեջ չհայտնվեր։ Կարծում եմ հաջողվեց դժվարին իրավիճակում քաղաքը կառավարելը, ու ես հիմա հեռանում եմ պարզ ճակատով, գլուխս բարձր պահած»,- ասաց Կարեն Բադալյանը։
Ունի՞ նոր աշխատանքի առաջարկ, որտե՞ղ կշարունակի իր գործունեությունը, Կարեն Բադալյանն ասում է՝ որևէ մտահոգություն չունի, քանի որ ունի կրթություն, գիտելիք ու և ամենակարևորը՝ փորձ․ 30 տարի անընդմեջ աշխատել է։
Հիշեցնենք, որ Սարիկ Մինասյանի՝ Գյումրու քաղաքապետի պաշտոնակատար նշանակվելուց հետո մի քանի բաժնի պետեր հրաժարականի դիմումներ ներկայացրեցին։ Նրանցից շատերը «Բալասանյան դաշինքի» հրաժարական ներկայացնելուց հետո չէին հեռացել Գյումրու նախկին քաղաքապետ Վարդգես Սամսոնյանի հորդորով, որպեսզի չպարալիզացվի քաղաքապետարանի գործունեությունն ու Գյումրու կյանքը։
Նունե ԱՐԵՎՇԱՏՅԱՆ
