Սյունիքի մարզի ընդհանուր իրավասության դատարանի դատավոր Գարիկ Աբելյանի նախագահությամբ հունվարի 15-ին շարունակվում է Արցախի պաշտպանության բանակի նախկին հրամանատար Ջալալ Հարությունյանի դատավարությունը։ Այսօր մեղադրյալի պաշտպանական կողմը հանդես է գալիս եզրափակիչ ելույթով։ Մեղադրող եւ տուժող կողմերը միջնորդել են դատարանին մեղավոր ճանաչել Ջալալ Հարությունյանին, իսկ վերջինիս պաշտպանները գտնում են, որ իրենց վստահորդը պետք է արդարացվի։
Ըստ մեղադրանքի՝ գեներալ-լեյտենանտ Ջալալ Հարությունյանը զբաղեցնելով ՊԲ հրամանատարի պաշտոնն ու հանդիսանալով պաշտոնատար անձ՝ հանրային ծառայող, կոչման եւ պաշտոնի բերումով հանդիսանալով հրամանատար՝ ծառայողական դիրքով եւ զինվորական կոչումով, տվյալ իրավահարաբերության շրջանակում ունենալով իր լիազորություններից բխող հրամաններ եւ կարգադրություններ տալու ու դրանց կատարումն ապահովելու իրավասություն, հայտարարված ռազմական դրության ժամանակ՝ 2020թ. հոկտեմբերի 12-ին, ծառայության նկատմամբ դրսեւորել է անփույթ վերաբերմունք։ Մասնավորապես, իր ծառայողական պարտականությունների կատարման նկատմամբ անբարեխիղճ եւ անփույթ վերաբերմունքի հետեւանքով դրանք կատարել է ոչ պատշաճ, ինչն անզգուշությամբ առաջացրել է ծանր հետեւանքներ։
Ըստ քրեական գործի՝ «ՑՈՐԻ» զորամասի «Դ20 դիվիզիոնի» վրա հակառակորդի հարձակման ժամանակ դիվիզիոնի հրամանատարությունը կապ է հաստատում Ջալալ Հարությունյանի տեղակալ, հրետանու գծով պետ Գենադի Բաղդասարյանի հետ՝ տեղեկացնելով հակառակորդի հարձակման մասին, բայց Ջալալ Հարությունյանը պատասխանել է՝ որ մոտեցողները յուրայիններ են։
«Սույն գործով դատաքննության ժամանակ պարզվեց, որ իրարամերժ ու հակասական տվյալներ են հայտնել կարեւոր հանգամանքի վերաբերյալ։ Նման պայմաններում բարձր է հավանականությունը, որ Գենադի Բաղդասարյանը կարող է Ջալալ Հարությունյանի խոսքը որոշակի ձեւափոխած ներկայացնել կապավորներին, իսկ կապավորներն էլ իրենց հերթին Բաղդասարյանի խոսքը որոշակի ձեւափոխված փոխանցել դիվիզիոնի հրամանատարությանը։ Ավելին, նույնիսկ կապավորների սենյակում կա հավանականություն, որ Գենադի Բաղդասարյանի հետ կապի մեջ գտնվողը անմիջականորեն չի փոխանցել նրա խոսքը, այլ որոշակի ձեւափոխած է վերարտադրել»,-պաշտպանական ճառում նշեցին Ջալալ Հարությունյանի փաստաբանները։
Կարդացեք նաև
Ի դեպ, տուժողների իրավահաջորդների ներկայացուցիչ, փաստաբան Լիպարիտ Սիմոնյանի՝ դատաքննության ընթացքում հարցաքննված մոտ 50 վկայի ցուցմունքներն ամբողջությամբ Ջալալ Հարությունյանի դեմ են եղել։
Այս պահին դատական նիստը շարունակվում է։
Արմեն ԴԱՎԹՅԱՆ
