Մոսկվան Եվրոպական միությանը միանալու գործընթաց սկսելու Երեւանի որոշումը դիտարկում է որպես Եվրասիական տնտեսական միությունից Հայաստանի դուրս գալու սկիզբ. ինչպես հայտնում է ՏԱՍՍ-ը, լրագրողներին ասել է ՌԴ փոխվարչապետ Ալեքսեյ Օվերչուկը։
«Նրանք (Հայաստան) ասում են, որ չեն ծրագրում լքել ԵԱՏՄ-ն: Բայց ինչո՞վ է առանձնահատուկ ներկա իրավիճակը: Հայաստանի՝ Եվրամիության հետ մերձենալու մասին խոսակցություններ վաղուց կային, քննարկումներ կային, բայց 2025 թվականի հունվարի 9-ին ՀՀ կառավարությունը՝ աջակցելով ԵՄ անդամակցության գործընթացի մեկնարկի մասին օրինագծին, իրավական առումով էական քայլ ձեռնարկեց: Այստեղ է իրավիճակի յուրահատկությունը: Սա Հայաստանի կառավարության որոշումն էր, և մենք դա համարում ենք ԵԱՏՄ-ից Հայաստանի դուրս գալու սկիզբ», – նշել է Օվերչուկը։
«Ցավոք, արդեն անցյալ տարի մենք տեսանք, որ ԵՄ-ին անդամակցելու քննարկումների ազդեցության տակ ռուսական բիզնեսն ավելի զգուշավոր դարձավ Հայաստանի հետ տնտեսական կապերի հետագա պահպանման և զարգացման հարցում», – ասել է ՌԴ փոխվարչապետը և հավելել. «մի շարք ոլորտների գործարար գործունեությունը սկսեց դադարել»:
Ըստ Օվերչուկի՝ ԵՄ-ի հետ Հայաստանի առևտուրը մի քանի անգամ ավելի քիչ է, քան ԵԱՏՄ-ի հետ, Եվրամիության հետ Հայաստանի առևտրաշրջանառությունը նվազում է:
Կարդացեք նաև
«Եկել է 11 ամսվա թարմ վիճակագրություն. Ռուսաստանի և Հայաստանի միջև ապրանքաշրջանառությունը կազմում է 11,6 միլիարդ դոլար, ԵԱՏՄ-ի հետ՝ մոտ 12 միլիարդ դոլար: Միևնույն ժամանակ, ԵՄ-ի հետ Հայաստանի առևտուրը մի քանի անգամ քիչ է և նվազում է։ Սա մի բան է, որի մասին ասում են տնտեսությունն ու իրականությունը»,- նշել է Օվերչուկը:
«Եվրամիությանն անդամակցելու գործընթացի մեկնարկի մասին օրինագիծը նախաձեռնողները հիանալի հասկանում են, որ ԵՄ-ին անդամակցելը շատ հիպոթետիկ բան է, և, իհարկե, չեն ցանկանում կորցնել իրենց ունեցած տնտեսական օգուտներն ու առավելությունները՝ որպես ԵԱՏՄ անդամ երկիր»,- ասել է ՌԴ փոխվարչապետը։
Օվերչուկի խոսքով՝ ԵՄ-ին անդամակցելը անհամատեղելի է երկրի՝ Եվրասիական տնտեսական միությանը անդամակցելու հետ։
Ավելի վաղ ՀՀ կառավարությունը հավանություն էր տվել ԵՄ-ին անդամակցելու գործընթացի մեկնարկի մասին բանաձեւի նախագծին, իսկ այժմ խորհրդարանը կքննարկի այն։ Վարչապետ Նիկոլ Փաշինյանը նշել է, որ սա «չի նշանակում Հայաստանի անդամակցություն Եվրամիությանը բառիս բուն իմաստով, քանի որ այս հարցի վերաբերյալ որոշում կարող է կայացվել միայն հանրաքվեի միջոցով»։
