«Որեւէ բան անսահման չի լինում, առավել եւս, եթե դա կապված է բյուջեի հետ: Առողջապահությունն ունի տարեկան բյուջե, որի շրջանակներում իրականացնում է բուժսպասարկումը»,-ասուլիսում նշեց առողջապահության նախարար Անահիտ Ավանեսյանը՝ պատասխանելով պետպատվերի վերաբերյալ հանրության դժգոհություններին եւ լրագրողի հարցին:
«Օֆերտայի տրամաբանությունը նրանում է, որ ոչ թե ամեն բժշկական կենտրոն ունի պայմանագրային գումար եւ անսահմանափակ ծառայությունների շրջանակ, որը տարիներ ի վեր այդպես էր մեր պետպատվերի տրամաբանությամբ, այլ մենք ունենք ամեն ծրագրի տարեկան, եռամսյակային եւ ամսեկան ընդհանուր չափեր, թե ինչքան կարող ենք ծառայություններ մատուցել: Եվ ես դրա համար կխնդրեմ մեր քաղաքացիների մոտ սխալ ակնկալիքներ չսերմանել՝ ասելով, որ ամեն ինչ պետք է լինի անսահմանափակ: Հայաստանում մեր օֆերտայի շրջանակներում կան տարեկան եւ ֆիզիկական հասանելիության հնարավորություններ, նաեւ մեր բուժհաստատությունների ռեսուրսներն անսահմանափակ չեն…»,-հավելեց նա:
Գոհար ՀԱԿՈԲՅԱՆ
