Կառավարության շենքում Աննա Հակոբյանի մոդելային լուսանկարահանումն իրականացվել է անձամբ վարչապետի թույլտվությամբ։ Այս մասին «Փաստինֆոյի» դեկտեմբերի 6-ի հարցմանն ի պատասխան հայտնել են ՀՀ կառավարությունից։
Հիշեցնենք, Աննա Հակոբյանը նոյեմբերի 30-ին կադրեր հրապարակել՝ տարբեր դիրքերով ու կոստյումներով կառավարության շենքում նկարահանված։ «Փաստինֆո»-ն գրավոր հարցում էր ուղարկել կառավարություն՝ պարզելու թե ով է թույլ տվել Աննա Հակոբյանին որպես մոդել նկարահանումներ իրականացնել պետական շենքում, փորձել էինք պարզել նաեւ, թե որքան գումար է հատկացվել դրա համար։ Կադրերից երեւում էր, որ տեխնիկական հատուկ միջոցներ են օգտագործվել, որ Փաշինյանի կնոջը բարձրացնեն Հրապարակի ժամացույցի մոտ ու լուսանկարեն։ Կառավարությունից 30 օր ժամանակ էին խնդրել այս հարցերին պատասխանելու համար։
Ի վերջո, հայտնել են, որ խնդրո առարկա լուսանկարահանումն իրականացվել է պետական արարողակարգային նպատակով, վարչապետի թույլտվությամբ ու մասնակցությամբ։ Գրավոր պատասխանում որեւէ խոսք չկար, թե կոնկրետ ինչ արարողակարգային նկարահանման մասին է խոսքը։
Մենք նաև հետաքրքրվել էինք, թե արդյոք կառավարության շենքի տարածքը կարող է վարձակալությամբ տրամադրվել մոդելային գործակալություններին՝ նկարահանումների համար։ Այս հարցին կառավարությունից չէին պատասխանել, բայց նշել էին, թե Փաշինյանի կնոջ նկարահանումների համար գումար չի ծախսվել, այսինքն՝ պետական միջոցներն են ծառայեցվել են նրա ցանկությունների կատարմանը։
