«Այս պահին Հայաստանը ԵԱՏՄ անդամ է, եւ այս պահին կառավարության օրակարգում ԵԱՏՄ անդամակցությունից դուրս գալու հարց չկա»,- այսօր հրավիրած ասուլիսում ասաց էկոնոմիկայի նախարար Գեւորգ Պապոյանը։
«Եվրամիության անդամակցության գործընթացը դա զուգահեռ օրակարգ է, եւ մեր խնդիրը ոչ թե այդ օրակարգերը քննարկելն է, այլ մեր տնտեսության դիմակայունությունն ու մրցունակությունը բարձրացնելն է։ Էական չէ՝ Հայաստանը կլինի ԵԱՏՄ-ում, թե ԵՄ-ում, ուր կլինի, մեր տնտեսությունը պետք է մրցունակությունն ավելացնի։ Մենք պետք է հնարավորինս շատ բարդ ապրանքներ արտադրենք, հնարավորինս բարձր եւ մրցունակ ծառայություններ մատուցենք։ Որտեղ որ լինենք, մեր ապրանքները պետք է լինեն ամենամրցունակը կամ ամենամրցունակներից մեկը»,- հավելեց նա։
Նա նշեց, որ Լարսի անցակետն այս պահին ազատ է, հերթեր չկան, այսինքն՝ արտահանման խնդիր չկա։ «Որեւէ պահի մենք չենք մտածում ԵԱՏՄ-ն փոխարինել ինչ-որ բանով։ Մենք ուզում ենք լինել անկախ, իսկ անկախությունն այն է, երբ դու բոլորից ես կախված, ոչ թե մեկից, եւ բոլորն էլ ինչ-որ չափով քեզանից են կախված։ Մենք պետք է դառնանք մի պետություն, որ եթե հանկարծ մեզ հետ ինչ-որ բան պատահի, այլ երկրների տնտեսությունների հետ էլ բան կպատահի։ Եվ այդ դեպքում մեզ հետ ոչ մի բան չի պատահի»,- նշեց Պապոյանը։
Կարդացեք նաև
Ռոզա ՀՈՎՀԱՆՆԻՍՅԱՆ
