2024 թվականին Հայաստան է այցելել մոտ 2 մլն 215 հազար զբոսաշրջիկ։ Այդ մասին այսօր հրավիրած ասուլիսում ասաց էկոնոմիկայի նախարար Գեւորգ Պապոյանը։
«Սա մոտավորապես 7 տոկոս նվազել է անցած տարվա համեմատ, բայց նվազել է միայն Ռուսաստանից եկող զբոսաշրջիկների թիվը։ Եվ այլ երկրներից՝ Հնդկաստան, ԱՄԷ, Վրաստան, Ֆրանսիա, Իրան, Չինաստան, զբոսաշրջիկների թիվն ավելացել է։
Մենք հիմա 2,2-2,3 մլն զբոսաշրջիկի շրջանակում ենք, մեր թիրախն է 2026 թվականին ունենալ 2,5 մլն զբոսաշրջիկ, և, ըստ էության, այս պահին թիրախով գնում ենք։ Հենց այսքան զբոսաշրջիկ էինք պատկերացնում, որ 2024 թվականի համար պետք է ունենայինք։ Ի՞նչ ենք անում այս ուղղությամբ, ոչ միայն զբոսաշրջային կլաստերներ են զարգացնում եւ պատմամշակութային օբյեկտներն ենք բարեկարգում, այլ նաեւ 500-ից ավելի հոդվածներ ենք հրապարակել միջազգային պարբերականներում Հայաստանի մասին, 90-ից ավելի լրատվամիջոցների ներկայացուցիչներ, բլոգերներ եկել են Հայաստան։
Հայտնի է, որ Հնդկաստանի եւ այլ երկրների շատ քաղաքացիներ աշխատանքի նպատակով են գալիս Հայաստան, հարցին, թե նրանց որպես զբոսաշրջիկ են հաշվո՞ւմ, Պապոյանը պատասխանեց․ «Զբոսաշրջիկն այն մարդն է, ով աշխատանքի նպատակով չի գալիս տվյալ երկիր։ Այսինքն՝ եթե իրենք գալիս են աշխատանքային պայմանագիր են կնքում, ավտոմատ այլեւս զբոսաշրջիկ չեն դառնում։ Զբոսաշրջիկն այն մարդն է, ով առնվազն մեկ գիշեր անցկացնում է այդ երկրում, եւ սա աշխարհում ընդունված մեխանիզմ է, մենք չենք կարող այլ մեխանիզմով հաշվարկել։ Եվ այդ եղանակով հաշվարկել ենք»,- ասաց Պապոյանը՝ չհրապարակելով, թե, օրինակ, Հնդկաստանից քանի՞ զբոսաշրջիկ է եկել Հայաստան։
Կարդացեք նաև
Ռոզա ՀՈՎՀԱՆՆԻՍՅԱՆ
