Փաստաբան Ռոման Երիցյանի ֆեյսբուքյան գրառումը
Հարազատ եղբորորդու զոհվելու տարելիցին մասնակցելու նպատակով Ռոստովից Հայաստան ժամանած Արմեն Մնացականյանը արդեն 4 ամիս է, ինչ գտնվում է կալանքի տակ՝
իշխանության յուրացման նախապատրաստության մեղադրանքով։ Այնուամենայնիվ, մինչև հիմա անհայտ է և չի պարզաբանվում, թե կոնկրետ ինչպես էր վերջինս նախատեսում յուրացնել իշխանությունը Հայաստանում։
Ինչ պայմաններ է նա ստեղծել, ինչ միջոցներ ու գործիքներ ձեռք բերել կամ հարմարեցրել իշխանություն յուրացնելու համար, որը, սակայն, ավարտին չի հասցրել իր կամքից անկախ հանգամանքներով։
4 ամիս է մարդուն ապօրինի պահում են կալանքի տակ այն բանի համար, որ նա ներկա է եղել ՀՀ իշխանությանը Ռուսաստանում քննադատող հայտարարություններին։ Ավելի պարզ՝ Արմեն Մնացականյանը մեղադրվում է այն բանում, թե իբրև ինքը մի քանի անձանց հետ միասին Հայաստանի իշխանությանը քննադատող հայտարարություններ է կատարել՝ հավելելով, որ նրանցից օր առաջ պետք է ձերբազատվել։ Խոսքեր, որոնք Հայաստանում և ամբողջ աշխարհում հնչեցվում են գրեթե ամեն րոպե։
Կարդացեք նաև
Իհարկե, քննչական կոմիտեն ու ԱԱ ծառայությունը այս ամենը ներկայացրել են իբրև դարի բացահայտում՝ հրապարակելով ինչ-որ խուզարկության արդյունքներ և ձերբակալման կադրեր, սակայն վստահ եղեք՝ Արմեն Մնացականյանին առաջադրված մեղադրանքը կեղծ է ու շինծու, իսկ ձեռք բերված ապացույցներն ու տվյալներն էլ ոչ բավարար՝ անգամ փողոցային մակարդակով հարց ու պատասխան ունենալու համար։ Հավելեմ, որ բնակարանի խուզարկությամբ Արմեն Մնացականյանի մոտ որևէ արգելված իր չի հայտնաբերվել, իսկ անձնական խուզարկության արդյունքում էլ արձանագրվել, որ նրա սպորտային տաբատի աջ գրպանում կա թաշկինակ։
Չեն բացառում, որ հենց այդ թաշկինակի վրա Արմեն Մնացականյանը պետք է ինչ-որ թույն լցներ ու թրիլլերային ֆիլմերում ցուցադրված եղանակով ուշաթափեցներ Հայաստանի իշխանության ներկայացուցիչներից որևէ մեկին կամ բոլորին։
