Տիգրան Պետրոսյանի անվան շախմատի տուն-մարզադպրոցի դահլիճում կայացավ հայկական շախմատի բացառիկ երախտավորներից մեկի՝ միջազգային կարգի մրցավար Աշոտ Վարդապետյանի 70-ամյակին նվիրված արագ շախմատի մրցաշար:
Հոբելյարը Aravot.am-ի հետ զրույցում ասաց. «Ես իմ ամբողջ կյանքը նվիրել եմ շախմատին, հայկական շախմատի զարգացմանը եւ համաշխարհային ճանաչում բերելուն: Երջանիկ եմ դրա համար, երախտապարտ՝ գործընկերներիս, իմ ընտանիքին, որն ամեն ինչով սատարել ու աջակցել է ինձ: Խորին շնորհակալությունս եմ հայտնում այս նախաձեռնությանը միացած բոլորին՝ Հայաստանի ազգային հավաքականի անդամներին, գրոսմայստերներին, կարգային եւ շարքային շախմատիստներին: Ես նրանց մասնակցությունը այս մրցաշարին ընկալում եմ որպես իմ աշխատանքի եւ համեստ անձի գնահատում: Եվ դա ամենաարժեքավոր նվերն է իմ համար»:
Յոթ տուրում 6,0-ական միավոր վաստակեցին գրոսմայստերներ Հայկ Մարտիրոսյանը եւ Կարեն Գրիգորյանը, սակայն լրացուցիչ ցուցանիշներով հաղթող ճանաչվեց Հայկ Մարտիրոսյանը: Եվս չորս շախմատիստ վաստակեց 5,5-ական միավոր ու կրկի լրացուցիչ ցուցանիշներով մրցանակային երրորդ տեղն զբաղեցրեց միջազգային վարպետ Դավիթ Շահինյանը:
Կարդացեք նաև
Շախմատի համաշխարհային օլիմպիադայի եռակի հաղթող, աշխարհի թիմային չեմպիոն, 100-ամյակի աշխարհի լավագույն թիմ Հայաստանի տղամարդկանց ազգային հավաքականի անդամ Գաբրիել Սարգսյանը մեզ հետ զրույցում ասաց. «Ուզում եմ շնորհավորել ընկեր Վարդապետյանին 70-ամյա հոբելյանի առթիվ: Նա շատ բան է արել հայկական շախմատի համար: Այս մրցաշարին մասնակցելը ինձ համար պարտավորության նման մի բան է: Ընկեր Վարդապետյանը ոչ միայն որպես մրցավար, այլ նաեւ որպես կազմակերպիչ անգնահատելի ներդրում ունեցավ «Միկա» թիմի, որի կազմում ես էլ էի խաղում, նվաճումների գործում: Նրա ներկայությունը Հայաստանի ազգային հավաքականների կողքին վստահություն է փոխանցել մեր ուժեղագույն շախմատիստներին, կարեւոր նշանակություն է ունեցել երիտասարդ շախմատիստների համար: Թերեւս, անգնահատելի է Աշոտ Վարդապետյանի կատարած աշխատանքը համաշխարհային շախմատում, մասնավորապես, շախմատային մրցավարության ոլորտում: ՖԻԴԵ-ն նրան համաշխարհային ու Եվրոպական ամենաբարձր մակարդակի բազմաթիվ առաջնություններում ու մրցաշարերում վստահել է գլխավոր մրցավարի պարտականությունը: Իսկ այն, որ պարոն Վարդապետյանին շախմատի աշխարհի չեմպիոնն ու հավակնորդը երկու անգամ անձամբ են ընտրել են որպես թագի համար մրցամարտի գլխավոր մրցավար, դա արդեն պատմական երեւույթ է ու հպարտություն Հայաստանի, հայկական սպորտի եւ շախմատի համար»:
Մրցաշարի ավարտին Աշոտ Վարդապետյանի ընտանիքը նրա համար անակնկալ էր պատրաստել: Որդիները ընտանիքի անունից հոբելյարին շախմատային արքայի տեսքով հուշանվեր հանձնեցին: «Որքան շախմատի արքան է կարեւոր շախմատում, այդքան էլ մեր հայրն է մեզ համար կարեւոր այն արժեքների մեջ, ինչում ինքը կա: Դա հայրենիքն է, ընտանիքն է եւ շախմատը»,-նվերը հանձնելով ասաց Աշոտ Վարդապետյանի ավագ որդին:
Աշոտ ՀԱԿՈԲՅԱՆ
