Հինգշաբթի Սպիտակ տանը կայացած ճեպազրույցում ԱՄՆ նախագահն ասել էր, որ Կալիֆոռնիա նահանգին տրամադրվել են դաշնային ռեսուրսներ ու լրացուցիչ ֆինանսավորում՝ անտառային հրդեհների դեմ պայքարելու համար, որոնք նախագահը կոչել է «Լոս Անջելեսում երբևէ արձանագրված ամենավատ հրդեհներ»:
Ըստ Բայդենի՝ հատկացված միջոցները կուղղվեն, որպեսզի 180 օր հոգան ժամանակավոր կացարանների կարիքները, վերացնեն վտանգավոր նյութերը, վճարեն արագ արձագանքման ծառայության աշխատակիցների աշխատավարձերը, կատարեն կյանքի ապահովագրության հետ կապված ծախսերը:
Խոսել է նաև ԱՄՆ փոխնախագահ, նախկինում Սենատում Կալիֆոռնիան ներկայացնող Քամալա Հարիսը՝ նահանգում տիրող իրավիճակը բնութագրելով որպես «ապոկալիպտիկ» և «մի բան, որն իր ազդեցությունը կունենա գալիք ամիսների և տարիների ընթացքում»:
Ինչպես հայտնի է, փոխնախագահը տուն ունի այն հատվածում, որի բնակիչները տարհանվել են, սակայն տակավին պարզ չէ՝ արդյո՞ք նրա տունը ևս վնասվել է:
Կարդացեք նաև
Նորըտիր նախագահ Դոնալդ Թրամփը սոցիալական ցանցում անտառային հրդեհների հարցում քննադատել է նախագահ Բայդենին և Կալիֆոռնիայի դեմոկրատ նահանգապետ Գևին Նյուսոմին:
«Ամերիկայի Միացյալ Նահանգների լավագույն և ամենագեղեցիկ հատվածներից մեկը ամբողջապես այրվել է»,- չորեքշաբթի ուշ երեկոյան գրել է Թրամփը իր Truth Social սոցիալական ցանցում՝ քննադատելով նահանգապետ Նյուսոմին հրդեհների հարցում և կոչ անելով նրան հրաժարական տալ:
Թրամփը հինգշաբթի վերադարձել է այս թեմային՝ մեղադրելով Նյուսոմին հրդեհների մարումը վատ կազմակերպելու և երաշտից տուժած Կալիֆոռնիայում ջուրը վատնելու մեջ:
Նախագահ Բայդենն ու Կալիֆորնիայի նահանգապետը կտրականապես հերքել են Թրամփի մեղադրանքները։
Հինգշաբթի կայացած ճեպազրույցում Լոս Անջելեսի քաղաքային և շրջանային պաշտոնյաները նոր տեղեկություն են ներկայացրել հրդեհների և դրանք մարելուն ուղղված աշխատանքների մասին:
«Սա աննախադեպ, պատմական հրդեհ է»,- ասել է Լոս Անջելեսի քաղաքապետ Քերին Բասը:
Քաղաքի հրշեջ ծառայության ղեկավար Քրիստին Քրոուլին լրագրողներին փոխանցել է, որ հրդեհների պատճառ դարձած կատաղի քամիները հանդարտվել են՝ հնարավորություն տալով հրշեջներին ընդլայնել ջանքերը և վերսկսել կրակի մարման օդային գործողությունները:
Կալիֆոռնիայի անտառային տնտեսության և հրդեհային պաշտպանության դեպարտամենտը հայտարարել է, թե դեռ պայքարում են Լոս Անջելեսի տարածքում առաջացած հինգ անտառային հրդեհների դեմ։ Խոսքը՝ Փալիսադես, Իտոն, Հերսթ, Լիդիա և Սանսեթ հրդեհների մասին է, ընդ որում՝ Փալիսադես և Իտոն հրդեհները ամենամեծն են:
Հինգշաբթի հայտարարվեց նաև վեցերորդ հրդեհի՝ Քենեթի բռնկման մասին՝ Վուդլենդ Հիլզի մոտ:
Նշենք նաև՝ այս ընթացքում հրդեհված թաղամասերում արձանագրվել են գողության դեպքեր: Նախորդ օրերին առնվազն 20 մարդ է ձերբակալվել թալանելու համար:
«Ձեզ խոստանում եմ՝ դուք պատասխանատվության կենթարկվեք։ Ամո՛թ նրանց, ովքեր թալանում են մեր բնակիչներին այս ճգնաժամի ժամանակ»,- ըստ The Los Angeles Times-ի՝ հինգշաբթի՝ ասուլիսի ժամանակ, հայտատարել է Լոս Անջելեսի Վերահսկիչների խորհրդի անդամ Քեթրին Բարգերը:
Նյութն ամբողջությամբ՝ սկզբնաղբյուր կայքում
