Aravot.am-ին հասած տեղեկություններով, Գյումրու՝ մարտի 30-ին կայանալիք ՏԻՄ ընտրություններում ընդդիմադիր քաղաքական ուժերը՝ մասնավորապես ՀՀԿ-ն ու ՀՅԴ-ն միասնական թեկնածուով հանդես չեն գա։
Նրանք կմասնակցեն սեփական թեկնածուով, ՀՅԴ-ի դեպքում շոշափվում է Շիրակի նախկին մարզպետ Հովսեփ Սիմոնյանի անունը, որը Սամվել Բալասանյանի հետ մրցակցում էր քաղաքապետի պաշտոնի համար։ Նա այդ ժամանակ Շիրակի մարզպետարանի ֆինանսատնտեսական վարչության պետի տեղակալն էր։
ՀՀԿ-ի դեպքում շոշափվում է նախկին իրավապաշտպան Կարապետ Պողոսյանի անունը, որը Գյումրու՝ 2021 թվականի ՏԻՄ ընտրություններում մասնակցում էր՝ գլխավորելով «Թասիբով» դաշինքը։ Ի դեպ, նա բավական ակտիվ էր դարձրել նախընտրական շրջանը՝ հետաքրքիր քայլեր նախաձեռնելով ու ինտրիգներ մտցնելով։
Aravot.am-ի հետ զրույցում Հովսեփ Սիմոնյանն ասաց, որ ՀՅԴ-ն մասնակցելու որոշում կայացրել է, սակայն հայտնի չէ՝ ինչ ձևաչափով՝ միայնա՞կ, թե՞ դաշինքով, հետևաբար և այս պահին ցուցակի առաջին համարից խոսելն անհնար է։
Կարդացեք նաև
Կարապետ Պողոսյանից այս թեմայի շուրջ հնարավոր չեղավ պարզաբանում ստանալ, քանի որ Գեղարքունիքի մարզի ընդհանուր իրավասության առաջին ատյանի դատարանը նրան զրկել է ամենակարևոր ազատությունից՝ խոսելու, կարծիքը բարձրաձայնելու, հարցազրույցներ տալու, սոցցանցերում հրապարակումներ կատարելու իրավունքից։
ՀՀԿ Շիրակի մարզային կառույցից էլ մեզ պարզաբանեցին, որ կուսակցության մասնակցության վերաբերյալ դեռ քննարկման փուլում են։
Նշենք, որ բազմաթիվ անձանց ու քաղաքական ուժերի անվանումներ են շրջանառվում, որոնք պատրաստվում են մասնակցել Գյումրու ՏԻՄ ընտրություններին։ Ամենայն հավանականությամբ՝ առնվազն 10-12 քաղաքական ուժեր կմասնակցեն։
Առայժմ շատ հստակ է ՔՊ-ի, ԴՕԿ կուսակցության, Գյումրու նախկին քաղաքապետ Վարդան Ղուկասյանի մասնակցության մասին տեղեկատվությունը, վերջիններս մի քանի անգամ արդեն հայտարարել են իրենց մասնակցության մասին։
Նունե ԱՐԵՎՇԱՏՅԱՆ
