«2024թ տեսչական մարմնի կողմից իրականացվել է ավելի քան 1300 ստուգում եւ դիտարկում, ինչպես նաեւ 55000-ից ավելի ուսումնասիրություններ եւ հետազոտություններ: Կայացվել են 8600-ից ավելի վարչական պատասխանատվության ենթարկելու մասին վարչական ակտեր, որոնց հանրագումարը թվային արտահայտմամբ գերազանցում է 2 մլրդ դրամը: Այս պահին պետական բյուջե մուտքագրված ընդհանուր գումարը կազմում է շուրջ 400 մլն դրամ»,- «Արմենպրեսի» մամուլի սրահում կայացած ասուլիսում նշեց ՀՀ քաղաքաշինության, տեխնիկական եւ հրդեհային անվտանգության տեսչական մարմնի ղեկավար Գարեգին Խաչատրյանը՝ ամփոփելով կառույցի՝ 2024 թ. աշխատանքները։
Գարեգին Խաչատրյանի խոսքով, բոլոր այն օբյեկտները կամ սուբյեկտները, որոնց պարագայում տարբեր պատճառներով տեսչական մարմինը 2024թ հնարավորություն չի ունեցել իրականացնելու համապատասխան վերահսկողական գործառույթներ, դրանք իրականացվելու են 2025թ:
Քաղաքաշինության, տեխնիկական եւ հրդեհային անվտանգության տեսչական մարմնի ղեկավարի ձեւակերպմամբ, ամենառիսկայինը տեխնիկական եւ հրդեհային անվտանգության ոլորտն է. «Այս ոլորտում 2024թ տեսչական մարմնի կողմից իրականացվել է 2300-ից ավելի ստուգում եւ հետազոտություն, որոնց արդյունքում հայտնաբերված խախտումների թիվը գերազանցել է 4500-ը: Նաեւ տեսչական մարմնի մասնագետների կողմից ուսումնասիրվել է բարձր ռիսկայնության աստիճանի օբյեկտների՝ թվով 1300 ինժեներական նախագիծ, հրդեհային անվտանգության նորմատիվների պահպանման մասով եզրակացություններ տրամադրելու նպատակով»:
Գարեգին Խաչատրյանն ընդգծեց, որ խոշոր առեւտրի օբյեկտներում հրդեհատեխնիկական հետազոտություն անցկացնելու՝ 2023-ին մեկնարկած գործընթացը շարունակվել է նաեւ 2024-ին: Հիշեցրեց, որ 2023-ի տարեսկզբին տեսչական մարմնի կողմից Հայաստանում գործող գրեթե բոլոր խոշոր առեւտրի օբյեկտներում իրականացվել են հրդեհատեխնիկական հետազոտություններ, եւ այնպիսի խախտումների դեպքում, որոնք կարող էին հանրության անվտանգությանը սպառնացող ռիսկ առաջացնել, կայացվել են որոշումներ՝ այդ օբյեկտների գործունեության դադարեցման վերաբերյալ:
Կարդացեք նաև
Մանրամասն՝ տեսանյութում
Գոհար ՀԱԿՈԲՅԱՆ
