Կրեմլը հայտարարել է, որ Հայաստանի հնարավոր անդամակցությունը Եվրամիությանը նրա ինքնիշխան իրավունքն է, սակայն երկու տարբեր միջազգային կազմակերպությունների անդամ լինելն անհնար է, հայտնում է Ինտերֆաքսը։
«Ի՞նչ է նշանակում ԵՄ-ին այս (Հայաստանի) անդամակցությունը, հիմա դժվար է ասել, քանի որ, իհարկե, երկու տարբեր կազմակերպությունների անդամ լինելը, հիպոթետիկ մտածելով՝ անհնար է», – լրագրողներին ասել է ՌԴ նախագահի մամուլի քարտուղար Դմիտրի Պեսկովը՝ պատասխանելով հարցին, թե որն է Մոսկվայի դիրքորոշումը Եվրամիությանը Հայաստանի անդամակցության հեռանկարների վերաբերյալ։
Պեսկովը նշել է. «Իհարկե, դա Հայաստանի ինքնիշխան իրավունքն է: Մենք գիտենք, որ ԵԱՏՄ-ին անդամակցությունը ձեռնտու է»:
Շեշտելով, որ հենց Եվրամիությունն է նախաձեռնում ԵՄ-ին Հայաստանի անդամակցության գործընթացը, ՌԴ նախագահի մամուլի քարտուղարն ընդգծել է. «Այստեղ մենք դեռ պետք է հասկանանք, թե Եվրամիությունն ինչ դիրքորոշում ունի այս հարցում։ Մենք ունենք Թուրքիայի Հանրապետության օրինակը, որը տասնամյակներ շարունակ պահպանում է դեպի ԵՄ անդամակցություն իր կողմնորոշումը, բայց Բրյուսելի կողմից մեծ փոխադարձության չի հանդիպում»։
Կարդացեք նաև
Պեսկովի խոսքով՝ «իրականում պետք է ելնենք այն աշխատանքային մեխանիզմներից, ինտեգրացիոն ձևաչափերից, որոնք արդեն ապացուցված են, որոնք շարունակում են աշխատել ի շահ դրանց մասնակից ժողովուրդների և երկրների (ԵԱՏՄ- «Ինտերֆաքս»)»:
Անդրադառնալով ԵԱՏՄ-ին ՀՀ անդամակցությանը՝ Կրեմլի ներկայացուցիչը նշել է, որ «իրերն իրենց անուններով կոչելով՝ սա շատ և շատ դրական դիվիդենտներ է տալիս Հայաստանին որպես պետություն, և նաև ժողովրդին»։
«Սա չափվում է տոկոսներով, աճի բարձր տեմպերով՝ կապված ԵԱՏՄ-ին անդամակցության հետ և այլն, և այլն», – ասել է Պեսկովը։
«Այս օրերին շփումներ չեն եղել». Պեսկովն այսպես է մեկնաբանել խաղաղության պայմանագրի շուրջ Հայաստանի և Ադրբեջանի բանակցությունները:
«Սա մեզ համար հեռու տարածաշրջան չէ, Ռուսաստանը Հարավային Կովկասի երկիր է, և մենք ցանկանում ենք, որ Կովկասում լինի խաղաղություն, կայունություն, կանխատեսելիություն», – ասել է նա:
