2024 թվականի մարտի 1-ից օրենքն արգելում է առանց բժշկի դուրս գրած էլեկտրոնային դեղատոմսի շուրջ 470 անուն դեղ գնել դեղատնից: Բացառապես էլեկտրոնային դեղատոմսով են վաճառվում հակաբիոտիկային, հակասնկային, հակամիկրոբակտերային, հակավիրուսային դեղերը, իմունային շիճուկները, պատվաստանյութերը, միզապրաստոլ պարունակող դեղերը: Կառավարությունը նախատեսում էր 2025 թվականի հունվարի 1-ից ընդլայնել էլեկտրոնային դեղատոմսերով բաց թողնվող դեղերի ցանկը, սակայն որոշումը հետաձգվել է մինչեւ ընթացիկ տարվա հուլիսի 1-ը:
Հետաձգման պատճառ են հանդիսացել համակարգի ներդրման գործընթացում ծագած խնդիրները: Վերջին տասն ամիսների ընթացքում պարզ է դարձել, որ տարբեր պատճառներով էլեկտրոնային տարբերակով դեղատոմսեր շատ քիչ են դուրս գրվում: Արդյունքում, Առողջապահական եւ աշխատանքի տեսչական մարմինն առանց էլեկտրոնային դեղատոմսի դեղ վաճառելու համար շատ մեծ չափսերի տուգանքներ է կիրառել դեղատների նկատմամբ, ինչն էլ առաջացրել է դեղատների դժգոհությունը: Խնդիրը ներկայացնելու նպատակով նամակով վերջիններս դիմել են Կառավարությանը, սակայն, ըստ նրանց, Առողջապահության նախարարությունից ստացված պատասխանը խնդրի լուծումներին չի անդրադարձել:
Համակարգի ներդրման գործընթացի վերաբերյալ հունվարի 8-ին աշխատանքային քննարկում էր կազմակերպել ԱԺ «Քաղաքացիական պայմանագիր» խմբակցության պատգամավոր Արսեն Թորոսյանը: Պատգամավորը, ճիշտ որոշում համարելով ներդրվող նոր համակարգը, նշել է, որ պետք է հավելյալ եւ կոնկրետ ջանքեր գործադրվեն, որպեսզի համակարգը լիարժեքորեն աշխատի, ինչն այսօր այդպես չէ:
Քննարկմանը մասնակցել են պատգամավորներ, Կառավարությունից ներկայացուցիչներ, դեղատնային ցանցերի եւ դեղատների ներկայացուցիչներ, ոլորտի պատասխանատուներ:
Կարդացեք նաև
Դեղատների ներկայացուցիչները, հորդորելով դադարեցնել տուգանքների կիրառումը, նշել են, որ իրենք չեն ուզում խախտել օրենքը, սակայն բժիշկները դուրս չեն գրում բավարար քանակությամբ դեղատոմսեր, իսկ իրենք բուժառուներին չսպասարկել չեն կարող:
Նշվել է, որ խնդրին լուծում չտալու դեպքում հնարավոր է տուգանքների հետեւանքով սնանկանան դեղատները, մեծանա ստվերային շրջանառությունը եւ այլն:
Քննարկմանը մասնակցող դեղատան ներկայացուցչի խոսքով համակարգի արդյունավետ գործարկման նպատակով իրենց դեղատնային ցանցի ղեկավարությունն աշխատողների համար լրացուցիչ խրախուսման նորմ է սահմանել, այն է` մեկ էլեկտրոնային դեղատոմս դուրս գրելու համար սահմանելով 500 դրամ պարգեւավճար: «180 դեղատուն եւ խրախուսում ունենալու պարագայում դեկտեմբեր ամսվա ընթացքում մենք սպասարկել ենք 104 էլեկտրոնային դեղատոմս»,- ընդգծել է զեկուցողը:
Առողջապահության փոխնախարար Արտակ Ջումայանն էլ փաստել է` էլեկտրոնային դեղատոմսերի դուրսգրման գործընթացը տեխնիկական առումով դյուրին է եւ արագ իրականացվող: Փոխնախարարի խոսքով համակարգի լավարկման նպատակով կշարունակվի բուժհաստատություններում վերապատրաստումների եւ այլ միջոցառումների իրականացումը:
Քննարկումը նախաձեռնող Արսեն Թորոսյանն առողջապահության նախարարությանն առաջարկել է բժիշկների կողմից տրվող դեղատոմսերի թվի աճին նպաստող կոնկրետ քայլեր մշակել ժամանակացույցի հետ մեկտեղ, որպեսզի խնդրին հնարավորինս սեղմ ժամկետներում լուծում տրվի եւ ամբողջ պատասխանատվությունը չմնա դեղատների ուսերին:
Հանդիպման ավարտին առաջիկայում հանդիպելու եւ առաջարկները քննարկելու պայմանավորվածություն է ձեռք բերվել:
ԱԺ
